Cuntegn da la pagina

Communicaziun da la regenza dals 7 da favrer 2019

  • Erste Mitteilung
  • Neuen Beitrag einfügen
La regenza ha prendì posiziun davart las midadas che la confederaziun ha previs per la lescha davart il provediment d'electricitad ed ha surdà il premi grischun da cultura 2019. Ultra da quai ha ella approvà ina nova via da velos en Engiadina bassa.

La regenza pretenda a lunga vista cundiziuns generalas pli fidadas per la forza idraulica svizra
La regenza ha prendì posiziun tar in project da consultaziun dal departament federal per ambient, traffic, energia e communicaziun (DATEC). Cun las midadas previsas da la lescha davart il provediment d'electricitad vul il cussegl federal adattar il martgà d'electricitad per garantir a lunga vista la segirezza dal provediment, per augmentar l'effizienza economica e per rinforzar l'integraziun da las energias regenerablas en il martgà. En spezial prevesa el d'avrir cumplettamain il martgà d'electricitad.
Il chantun Grischun, sco commember da la conferenza da las regenzas dals chantuns alpins (CRCA), sustegna la posiziun da quella pertutgant la midada previsa dal cussegl federal da la lescha davart il provediment d'electricitad. La regenza è pia dal medem avis sco la CRCA che l'avertura cumpletta dal martgà d'electricitad svizzer servia da princip a la segirezza dal provediment d'electricitad, sch'i vegnan resguardadas cundiziuns generalas gistas en la concurrenza e sch'i vegnan considerads ils differents interess. Ma ella giuditgescha actualmain che questas cundiziuns generalas na sajan anc betg fixadas en moda uschè fidada, sco quai ch'ellas stuessan esser per in provediment d'electricitad en Svizra segir a lunga vista, favuraivel, ecologic e responsabel.
La forza idraulica è en Svizra – e pia er en il chantun Grischun – il purtader d'energia indigen il pli impurtant per producir electricitad. Ella gida indispensablamain e vastamain a garantir la segirezza dal provediment d'electricitad a favur da la societad e da l'economia en Svizra. En sia posiziun a la confederaziun pretenda la regenza perquai cunzunt er cundiziuns generalas pli fidadas, che tegnan quint adequatamain da la gronda impurtanza e da la gronda valur da la forza idraulica svizra per la politica da provediment, per l'economia e per l'ecologia. Questas cundiziuns duain gidar a lunga vista a garantir la segirezza da planisaziun e d'investiziun da la forza idraulica svizra ed – en moda pli segira – particularmain er sia disponibladad per ils proxims onns.

Consultaziun dal departament federal per ambient, traffic, energia e communicaziun (DATEC)


Il premi grischun da cultura 2019 vegn surdà a Sacha Zala
La regenza ha surdà il premi grischun da cultura 2019 a l'istoricher Sacha Zala da Brusio per ses engaschament per segirar e per promover la lingua taliana. Sco president ha el renovà e professiunalisà l'organisaziun linguistica e culturala Pro Grigioni italiano. Sia lavur sco perscrutader da renum naziunal ed internaziunal è marcada d'in cor che batta profundamain per il Grischun talian e ch'al timunescha da cumbatter instancablamain per la lingua taliana. Il premi è dotà cun 30 000 francs.

-
©Twitter/Sacha Zala
Sacha Zala (a sanestra) discurra cun il cussegl federal Ignazio Cassis 

Plinavant ha la regenza surdà 9 premis da renconuschientscha e 7 premis da promoziun da mintgamai 20 000 francs. Ils premis vegnan surdads en il rom d'ina festa che ha lieu ils 29 da zercladur 2019 a las 13.15 a Brusio. 

Glista da tut ils titulars e las titularas dals premis 2019

Nova via da velos en Engiadina bassa
La regenza ha dà glisch verda per ina nova via da velos tranter Martina e Vinadi. Il traject existent percurra actualmain sin la via d'Engiadina. Il project da la vischnanca da Valsot prevesa ussa da construir tranter Ovella e Prà Dadora ina via da velos separada che percurra da la vart da la via principala. La via da velos previsa augmenta essenzialmain la segirezza e meglierescha las relaziuns da traffic sin quest traject da la via. Il chantun sa participescha cun ina contribuziun da maximalmain 675 000 francs a questa nova colliaziun da via da velos. Quest project è la 2. etappa da l'engrondiment planisà da la via da velos tranter Martina ed il cunfin naziunal. Il project general vegn structurà en totalmain 5 etappas d'engrondiment.

-
©Uffizi federal da topografia

Glisch verda per l'engrondiment da la chasa da scola da Zernez
La regenza ha approvà la revisiun parziala da la planisaziun locala, concludida da la vischnanca da Zernez ils 23 da settember 2018. La vischnanca ha l'intenziun da sanar e d'engrondir il stabiliment da scola existent en il center dal vitg da Zernez. Il plan da zonas approvà permetta da realisar in nov engrondiment da la chasa da scola. Per quest intent vegn midada la zona d'ina surfatscha da circa 562 meters quadrat.

-
©Comet Photoshopping ScRL/ Dieter Enz

Sustegn finanzial per la meglieraziun generala da Luzein
Per las lavurs da la meglieraziun generala da Luzein vegn concedida ina contribuziun chantunala da maximalmain 6,9 milliuns francs. Questa contribuziun dal chantun premetta ina contribuziun finanziala da la confederaziun, che sustegna il project cun circa 9,67 milliuns francs. Il territori dal project cumpiglia ina surfatscha da 1296 hectaras.

-


Gremi: regenza
Funtauna: rg chanzlia chantunala dal Grischun
Neuer Artikel