Navigaziun principala

Cuntegn da la pagina

Communicaziun da la regenza dals 14 da favrer 2019

  • Erste Mitteilung
  • Neuen Beitrag einfügen
La regenza ha prendì posiziun tar l'adattaziun planisada da las disposiziuns legalas per giuditgar l'examinaziun ecologica tar concessiuns da la forza idraulica. Ultra da quai ha ella dà glisch verda a l'engrondiment d'ina chasa da dimora e da tgira a Zizers.

La regenza pretenda il "stadi actual" sco basa per l'examinaziun ecologica tar concessiuns da la forza idraulica
La regenza ha prendì posiziun tar in project da consultaziun da la cumissiun dal cussegl naziunal per ambient, planisaziun dal territori ed energia (CAPTE-CN). Il project da la CAPTE-CN sa basa sin l'iniziativa parlamentara "Amplificaziun da la forza idraulica per la producziun e per l'accumulaziun d'electricitad. Adattaziun da l'examinaziun ecologica." Questa iniziativa pretenda l'adattaziun da las disposiziuns legalas per giuditgar l'examinaziun ecologica tar novs concessiunaments u tar midadas da concessiuns da la forza idraulica. En la situaziun giuridica actuala èsi contestà, tge stadi da partenza respectivamain da referenza ch'è da prender sco basa per l'examinaziun ecologica (EE) sco er per fixar la dimensiun da mesiras da cumpensaziun per intervenziuns en spazis da viver degns da vegnir protegids. Il punct central dal project è perquai la definiziun exacta da la noziun "stadi da partenza" per eliminar la malsegirezza giuridica che regna actualmain.
Il chantun Grischun sustegna sco commember da la conferenza da las regenzas dals chantuns alpins (CRCA) la posiziun da tala. Sco stadi da partenza per fixar mesiras a favur da la natira e da la cuntrada duai valair en l'avegnir il stadi che regna il mument da l'inoltraziun da la dumonda da renovaziun da la concessiun (stadi actual). Fixar il stadi da partenza sco stadi actual ha per consequenza ch'el furma la basa da las examinaziuns tant per rediger in rapport davart la cumpatibilitad ecologica per conceder l'emprima giada ina concessiun sco er per renovar la concessiun. Il medem mument serva quest stadi sco grondezza da referenza per decider, sche ed en tge dimensiun che mesiras da reconstrucziun e da cumpensaziun ston vegnir prendidas. La segirezza giuridica che vegn stgaffida uschia serva a la credibilitad ed è da gronda impurtanza per investiziuns en l'amplificaziun da la producziun d'electricitad cun forza idraulica en Svizra ed en il chantun Grischun.

- documents da consultaziun da la cumissiun dal cussegl naziunal per ambient, planisaziun dal territori ed energia (CAPTE-CN)
- posiziun da la conferenza da las regenzas dals chantuns alpins (CRCA)

Casa Fiora a Zizers po vegnir engrondida
La regenza ha approvà la revisiun parziala da la planisaziun locala che la vischnanca da Zizers ha concludì ils 23 da settember 2018. Cun questa approvaziun po ussa vegnir engrondida la chasa da dimora e da tgira "Casa Fiora" existenta. En spezial pervia da la serrada da la chasa da persunas attempadas "St. Johannesstift" duai il dumber da letgs vegnir augmentà dad oz 41 a 62. Per quest intent è planisà in edifizi nov al sid da l'edifizi existent.

-
©Comet Photoshopping ScRL / Dieter Enz


Gremi: regenza
Funtauna: rg chanzlia chantunala dal Grischun
Neuer Artikel