Navigaziun principala

Cuntegn da la pagina

In resultat allegraivel per il chantun Grischun l'onn 2018

  • Erste Mitteilung
  • Neuen Beitrag einfügen
Il quint annual 2018 dal chantun Grischun mussa in surpli nunspetgà ed allegraivlamain aut dal retgav operativ da 105 milliuns francs (onn precedent 78 milliuns). Quest resultat fitg positiv è la consequenza d'ina disciplina excellenta en connex cun las expensas sco er d'entradas pli autas. Cunzunt las taglias sin il gudogn tras la vendita da bains immobigliars sco er las taglias sin l'ierta e las taglias sin donaziuns han surpassà tant il preventiv sco er l'onn precedent. La distribuziun dubla dal gudogn da la banca naziunala svizra (BNS) e las restituziuns tras la AutoDaPosta Svizra SA han purtà ulteriurs milliuns. Il resultat total ha mo in lev plus ed importa 2,7 milliuns. Sco posiziuns extraordinarias resultan perditas da contabilitad sin investiziuns finanzialas da netto 22 milliuns sco er la furmaziun d'ina reserva da 90 milliuns – concludida dal cussegl grond – per il center da scola auta da la SATE Cuira.

Cun il quint 2018 han pudì vegnir cuntanschidas tut las finamiras e directivas da la politica da finanzas dal cussegl grond. Las valurs directivas ed ils indicaturs 2018 (onn precedent) èn:

  • resultat operativ 105,0 milliuns (78,0 milliuns)
  • resultat total 2,7 milliuns (128,8 milliuns)
  • entradas fiscalas 803,3 milliuns (775,2 milliuns)
  • investiziuns bruttas 384,7 milliuns (368,1 milliuns)
  • investiziuns nettas 239,7 milliuns (221,5 milliuns)
  • expensas totalas consolidadas 1997,0 milliuns (1985,4 milliuns)
  • quota statala 13,5 pertschient (13,8 pertschient)
  • grad d'atgna finanziaziun da las investiziuns nettas 119,3 pertschient (110,6 pertschient)

Resultat operativ excellent
En il sectur da manaschi è il resultat per 125,2 milliuns francs meglier che budgetà. Quai pervia dals custs totals pli bass (-114,7 milliuns) e pervia dals retgavs totals levamain pli auts (+10,4 milliuns). Ensemen cun il resultat da finanziaziun ha purtà il resultat operativ (quint economic 1. stgalim) in surpli dal retgav da 105,2 milliuns (onn precedent 78 milliuns). Budgetà era in deficit da circa 33 milliuns. En cumparegliaziun cun l'onn precedent èn ils custs da manaschi (-11,6 milliuns) sco er ils custs finanzials (-1,4 milliuns) tut en tut regressivs.

Da la vart dals custs n'èn differents credits tenor il preventiv betg vegnids exaurids. Ils custs da persunal èn restads cun 380,6 milliuns (onn precedent 376,1 milliuns) per stgars 7 milliuns sut il preventiv. Cun custs materials da 297,3 milliuns, ch'èn quasi nunvariads envers l'onn precedent, è il preventiv vegnì sutpassà per 28,6 milliuns. Ils custs da transfers da 1069,2 milliuns èn levamain sur il nivel da l'onn precedent (1065,9 milliuns) e per 61,4 milliuns sut il preventiv. Las amortisaziuns èn cun 71,6 milliuns (onn precedent 79,2 milliuns) per 17,0 milliuns sut il preventiv. Quai pervia dal volumen d'investiziun pli pitschen en la construcziun da vias.

Da la vart dals retgavs èn d'attribuir las meglieraziuns envers il preventiv sco er envers l'onn precedent principalmain a las suandantas posiziuns (cumparegliaziun cun il preventiv / cun l'onn precedent):

  • taglias chantunalas pli autas (+20,2 milliuns / +28,1 milliuns)
  • distribuziun supplementara da la banca naziunala svizra (+15,5 milliuns / +4,1 milliuns)
  • part dal chantun vi da las restituziuns incl. tschains da la AutoDaPosta Svizra SA (+17,0 milliuns / +17,0 milliuns)
Las entradas fiscalas da totalmain 803,3 milliuns han surpassà quellas da l'onn precedent (775,2 milliuns) per 3,6 pertschient ed èn cleramain sur la valur budgetada (783,1 milliuns). Quest augment è d'attribuir al svilup en connex cun las taglias sin il gudogn tras la vendita da bains immobigliars (+9,1 milliuns) e cun las taglias sin l'ierta e sin donaziuns (+8,7 milliuns). Las taglias pli autas sin las entradas e sin la facultad da las persunas natiralas equivalan circa als retgavs pli pitschens da las taglias sin il gudogn e sin il chapital da las persunas giuridicas.

La finanziaziun speziala "vias" ha l'onn 2018 in surpli dal retgav da 12,7 milliuns pervia d'expensas materialas e d'investiziun pli pitschnas. Budgetà era in deficit da 19,9 milliuns. Il surpli dal quint da las vias è vegnì bunifitgà al quint chantunal general. Il dabun da las vias resta sin il maximum legal da 100 milliuns.

Resultat extraordinari fitg negativ
Il resultat extraordinari (quint economic 2. stgalim) è cleramain negativ cun -102,5 milliuns. Tar las investiziuns finanzialas dal chantun han fluctuaziuns dals curs sin ils martgads da finanzas chaschunà adattaziuns contablas a las valurs dal martgà en la bilantscha sco er custs e retgavs extraordinaris. In augment da la valur da las aczias da la Repower SA (+22,3 milliuns) s'oppona a perditas da contabilitad da totalmain 44,6 milliuns sin differentas investiziuns finanzialas, particularmain sin ils certificats da participaziun da la banca chantunala grischuna (BCG / -22,5 milliuns), sin las aczias da la Ems-Chemie Holding SA (-12,6 milliuns) sco er sin las vaglias en ils mandats per l'administraziun da la facultad (-7,1 milliuns) e sin ulteriuras posiziuns (-2,4 milliuns).

Durant la sessiun d'october 2018 ha il cussegl grond furmà ina reserva da 90 milliuns francs sin donn e cust dal quint annual 2018 per prefinanziar il center planisà da scola auta per la SATE Cuira. La reserva per il tunnel da l'Alvra è vegnida schliada en la dimensiun dal progress da las lavurs da construcziun. Las contribuziuns pajadas per infrastructuras relevantas per il sistem èn vegnidas neutralisadas cun far prelevaziuns ord las reservas. Il resultat total – sco summa dal resultat operativ e dal resultat extraordinari – sa chatta tar in stretg plus da 2,7 milliuns.

Il surpli dal retgav augmenta l'agen chapital
L'agen chapital cumprovà importa stgars 2,5 milliardas la fin da l'onn 2018. Da quai èn passa 1,6 milliardas liadas a l'infrastructura necessaria per il manaschi (facultad administrativa), ad investiziuns finanzialas sco er a finanziaziuns spezialas ed a prefinanziaziuns. L'agen chapital libramain disponibel importa 418,3 milliuns. Ensemen cun ils meds finanzials reservads per finanziaziuns spezialas e per prefinanziaziuns da 403,1 milliuns importa l'agen chapital disponibel tut en tut 821,4 milliuns (onn precedent 782,3 milliuns).

Autas investiziuns nettas
Las investiziuns nettas cuntanschan l'onn 2018 ina valur da 239,7 milliuns. Ellas surpassan uschia la valur da l'onn precedent per 18,2 milliuns. Las expensas zunt autas planisadas da 445,8 milliuns èn dentant vegnidas sutpassadas cleramain cun 384,7 milliuns. Per ils projects currents da la construcziun auta e bassa sco er per ulteriuras investiziuns materialas èn resultadas expensas da totalmain 194,3 milliuns (onn precedent -8,3 milliuns; preventiv -25,3 milliuns). En cumparegliaziun cun l'onn precedent èn las expensas da la construcziun da vias sa reducidas per 18,8 milliuns, quellas da la construcziun auta èn s'augmentadas per 24,3 milliuns.

Sut las valurs planisadas èn er restadas las atgnas contribuziuns d'investiziun (-16,6 milliuns), las investiziuns immaterialas (-9,3 milliuns) ed ils emprests (-7,8 milliuns). Il motiv per quai è savens quel che las premissas per pajar ina contribuziun u per conceder in emprest n'è betg anc ademplidas a la fin da l'onn.

Perspectiva
Las finanzas chantunalas sa preschentan vinavant en ina buna constituziun. Per l'onn current dastga medemamain vegnir quintà cun in resultat operativ positiv. Grazia a la distribuziun dubla dal gudogn da la BNS e grazia a l'augment moderà dals custs durant l'onn 2018 èn gia enconuschentas u previsiblas meglieraziuns substanzialas envers il preventiv 2019. Las consequenzas dal svilup positiv da las finanzas durant l'onn 2018 mettan ina buna basa per ils onns suandants. Cun la disciplina d'expensas necessaria duessi esser pussaivel d'observar er en il preventiv 2020 las valurs directivas prescrittas dal cussegl grond. L'ulteriur svilup a partir da l'onn 2021 mussa tuttina in rom finanzial che daventa tendenzialmain pli stretg. Da prevair èn cunzunt perditas da productivitad pervia dal nov agiustament da la gulivaziun da finanzas federala sco er pervia da la refurma da l'imposiziun da taglia sin interpresas e pervia da la finanziaziun da la AVS (RFFA) sin plaun federal e chantunal. Decisivas per l'avegnir èn libertads d'agir suffizientas per tegnair en equiliber las finanzas chantunalas.

Il cussegl grond vegn a tractar il quint annual 2018 durant sia sessiun extra muros (11 – 14 da zercladur 2019) a Puntraschigna.


Agiuntas:

- bilantscha per ils 31 da december 2018
- quint economic 2018
- quint d'investiziun 2018

Ulteriuras infurmaziuns: departament da finanzas e vischnancas


Infurmaziuns:
cusseglier guvernativ dr. Christian Rathgeb, schef dal departament da finanzas e vischnancas, tel. 081 257 32 01, e-mail Christian.Rathgeb@dfg.gr.ch


Gremi: departament da finanzas e vischnancas
Funtauna: rg administraziun da finanzas
Neuer Artikel