Die Regierung nimmt Stellung zu einer Vernehmlassungsvorlage des Bundes betreffend Bundesinventar der schützenswerten Ortsbilder der Schweiz. Zudem gibt sie grünes Licht für den Ausbau des Autobahnanschlusses Grono Nord.
La regenza pretenda da sistir la revisiun totala da l'ordinaziun davart l'inventari federal dals lieus svizzers d'impurtanza naziunala degns da protecziun
La regenza ha prendì posiziun tar la revisiun totala da l'ordinaziun davart l'inventari federal dals lieus svizzers d'impurtanza naziunala degns da protecziun (OISOS) per mauns da l'uffizi federal da cultura. Quest inventari federal è in instrument impurtant per garantir la qualitad e per proteger lieus e parts da lieus d'impurtanza naziunala. En la pratica datti dentant adina puspè difficultads e tschertas malsegirezzas giuridicas. La revisiun totala proponida augmenta la segirezza giuridica en quest sectur.
Da princip beneventa la regenza grischuna la revisiun totala da la OISOS. Ella pretenda però che las midadas previsas vegnian coordinadas meglier cun ils interess impurtants da la planisaziun dal territori. En il sboz qua avant maun s'occupa il cussegl federal memia pauc da la finamira da concentrar ils abitadis, formulada en la lescha federala davart la planisaziun dal territori revedida. I n'è betg cler en tge relaziun che la finamira da concentraziun e la finamira da mantegnair objects stattan ina cun l'autra. Ultra da quai crititgescha la regenza il mument da la revisiun totala. Actualmain èn pendentas sin plaun federal duas iniziativas parlamentaras che pudessan influenzar la concepziun concreta. Sut quest aspect propona la regenza da sistir ad interim la revisiun totala da la OISOS.
Documents da consultaziun dal departament federal da l'intern
Entrada en vigur da la lescha davart la planisaziun dal territori per il chantun Grischun
La revisiun parziala da la lescha davart la planisaziun dal territori per il chantun Grischun, concludida dal cussegl grond en sia sessiun d'october 2018, vegn messa en vigur per il 1. d'avrigl 2019. En il center da questa revisiun stattan l'introducziun d'ina taxa da plivalur per enzonaziuns, che vegn pretendida dal dretg federal sco er mesiras da concentrar ils abitadis. Sco consequenza da la revisiun da la lescha ha la regenza stuì adattar er l'ordinaziun davart la planisaziun dal territori per il chantun Grischun. En quest connex sa tracti en emprima lingia da prescripziuns concernent la procedura per incassar la taxa da plivalur. La regulaziun davart la taxa da plivalur entra en vigur il 1. d'avrigl 2019. Il plan directiv chantunal "Abitadi" duess vegnir approvà proximamain dal cussegl federal. Il chantun Grischun prevegn uschia ad in moratori d'enzonaziuns general a partir dal 1. da matg 2019.
L'access a l'autostrada Grono nord vegn amplifitgà per il traffic
Il project per la correcziun da la via taliana, mez access Grono nord, è vegnì approvà da la regenza cun intginas permissiuns e cun intginas cundiziuns. Sin il territori communal da Grono maina la via taliana parallelamain a la via naziunala N13 sco avertura principala tras il territori d'abitadi da Grono. Actualmain vegn il mez access Grono nord duvrà mo sco access da mantegniment. L'uffizi federal da vias vegn dentant a dar liber quest access en l'avegnir per il traffic. Sco premissa per dar liber l'access ston las vias communalas da colliaziun via Golena e via Centro Sportivo sin l'areal industrial Pascolet che sa chatta tranter la via taliana e la via naziunala, vegnir adattadas architectonicamain. Tranter auter vegnan las cruschadas existentas via taliana/via Golena e via taliana/via Centro Sportivo concepidas da nov dal chantun, ed a la via Centro Sportivo vegnan construids novs parcadis publics sco er prolungà il trottuar tras la vischnanca da Grono. Ils custs per questas adattaziuns architectonicas importan 839 000 francs, 566 000 francs van a quint da la vischnanca da Grono e 273 000 francs a quint dal chantun.
©Uffizi federal da topografia
Gremi: regenza
Funtauna: rg chanzlia chantunala dal Grischun