Sco pretendì da la confederaziun e dals chantuns ha la Posta svizra mess a disposiziun ses sistem dad e-voting verifitgabel cumplettamain per in test d'intrusiun public dals 25 da favrer fin ils 24 da mars 2019. Ultra da quai ha la Posta preschentà il code da funtauna e la documentaziun dal sistem. Il test è terminà ed emprims resultats èn avant maun.

La finamira dal test d'intrusiun public e da la preschentaziun dal code da funtauna è stada quella da pudair scuvrir ed eliminar eventuals puncts debels avant che introducir il sistem. Quests dus instruments impurtants areguard in e-voting segir èn sa cumprovads. Tenor la communicaziun da la chanzlia federala dad oz han differentas mancanzas pudì vegnir scuvridas.

La confederaziun ed ils chantuns vegnan ussa ad analisar ils resultats dal test ed a publitgar in rapport. Suenter vegn la chanzlia federala ad examinar ils process d'admissiun e da certificaziun ed er a valitar, sche e tge adattaziuns ch'èn necessarias per il sistem da la Posta.

Eventualas consequenzas per il project dad e-voting dal chantun Grischun pon vegnir giuditgadas pir suenter quest pass. Anc adina vali che la segirezza ha l'emprima prioritad e ch'il e-voting vegn introducì en il Grischun pir, cur ch'in sistem dad e-voting verifitgabel cumplettamain stat a disposiziun. Quest sistem sto correspunder a tut las pretensiuns da segirezza tenor il dretg federal ed esser certifitgà ed admess correspundentamain da la confederaziun.


Infurmaziuns:
Daniel Spadin, chancelier, chanzlia chantunala, tel. 081 257 22 21, e-mail Daniel.Spadin@staka.gr.ch  


Gremi: rg chanzlia chantunala
Funtauna: rg chanzlia chantunala