La regenza ha surdà a la Smart Digitalization Group SA il project per l'avertura dal chantun cun l'internet a bindel ultralad. Ultra da quai ha ella approvà la sanaziun dal mir da fermada Isola.
Il chantun ha incumbensà in team d'experts d'accumpagnar las regiuns en connex cun la realisaziun da lur avertura cun bindel ultralad
En il rom da la realisaziun dal
concept da promoziun per l'avertura da las regiuns cun bindel ultralad nominescha la regenza in team d'experts cumprovads. Quest team gida las regiuns a planisar ed a realisar l'avertura. Il team chantunal da strategia e da coordinaziun cusseglia las regiuns ed examinescha, sch'ils concepts regiunals d'avertura èn plausibels e realisabels concernent la tecnica e l'economia.
Il schaner 2019 è vegnì publitgà il project "Team chantunal per il bindel ultralad en il Grischun" en la procedura averta tenor la lescha da submissiun. L'offerta da la Smart Digitalization Group SA cun sedia a Scuol ha persvadì grazia a ses cuntegn ed è stada l'offerta economicamain la pli favuraivla. La regenza ha perquai surdà questa lavur a la Smart Digitalization Group SA per la perioda da l'avrigl 2019 fin il december 2023. Per quest intent vegn approvà in import maximal da 700 000 francs, che vegn purtà – en il rom da la nova politica regiunala – mintgamai per la mesadad da la confederaziun e dal chantun.
Il chantun Grischun vul avrir las regiuns cun bindel ultralad. Quai duai promover l'attractivitad da l'economia locala da las regiuns. In'avertura cumpetitiva da las regiuns cun colliaziuns da bindel ultralad è ina premissa impurtanta per promover la transfurmaziun digitala en il chantun Grischun. La regenza ha perquai concludì gia il december 2018 da promover l'amplificaziun da l'avertura cun bindel lad cun contribuziuns dal credit d'impegn per infrastructuras relevantas per il sistem e da conceder contribuziuns da promoziun da la nova politica regiunala per lavurs concepziunalas en las regiuns.
La sanaziun dal mir da fermada Isola vegn approvada
La regenza ha approvà la dumonda da las Ovras electricas Mesauc SA "Sanaziun dal mir da fermada Isola ed ulteriuras mesiras" cun intginas pretensiuns e cundiziuns. Il mir da fermada Isola è vegni mess en funcziun l'onn 1962. Dapi il cumenzament dals onns 1970 sa defurmescha il mir da fermada Isola vers la vart da l'aua. Il motiv per quai è l'existenza da funtaunas da sulfat. Las tensiuns che resultan da quai chaschunan sfessas e chargian pli e pli las parts dal mir da fermada. Pervia da quai sto il mir da fermada vegnir distgargià. Las Ovras electricas Mesauc SA planiseschan da distgargiar las tensiuns cun in uschenumnà tagl da fresa a diamant en in bloc da mir. Supplementarmain prevesa il project da sanaziun da perfurar dus ulteriurs blocs da mir per allontanar aua. Igl è planisà d'exequir las lavurs da distgargia e da sanaziun durant ils mais d'enviern, cur ch'il spievel da l'aua dal lai è bass e cur ch'i dat paucs affluents. Durant la fasa da construcziun funcziuna l'ovra electrica sur il conduct normal da l'aua turbinada.
© Uffizi federal da topografia
Gremi: regenza
Funtauna: rg chanzlia chantunala dal Grischun