Navigaziun principala

Cuntegn da la pagina

L'uffizi per la valitaziun d'immobiglias survegn ina nova direcziun

  • Erste Mitteilung
  • Neuen Beitrag einfügen
La regenza grischuna ha nominà Gion-Reto Hassler sco nov manader da l'uffizi chantunal per la valitaziun d'immobiglias. El vegn a surpigliar questa funcziun il 1. da settember 2019.

La regenza grischuna ha elegì Gion-Reto Hassler da Maladers e da Donat, che ha 40 onns e ch'è geograf diplomà, sco nov manader da l'uffizi per la valitaziun d'immobiglias dal chantun Grischun.

Gion-Reto Hassler mida da l'economia privata en l'administraziun chantunala. Suenter differentas staziuns professiunalas ha el manà ils ultims 5 onns in team per la valitaziun d'immobiglias en ina banca a Turitg. Ultra d'experientscha da direcziun porta el cun sai enconuschientschas spezialisadas fundadas grazia ad in Master en geografia e grazia ad in Master of Advanced Studies in Real Estate. El è creschì si a Trimmis ed a Favugn. Actualmain abita el a Kloten e prevesa da turnar fin a l'entrada en plazza cun sia famiglia en la regiun da Cuira. Gion-Reto Hassler suonda a Romano Kunz che banduna ses uffizi suenter stgars 10 onns.

L'uffizi per la valitaziun d'immobiglias è responsabel per las valitaziuns uffizialas dals bains immobigliars e da las immobiglias en il chantun Grischun. Cun sias bunamain 60 collavuraturas e collavuraturs e cun 6 biros da valitaziun a Cuira, Tavau, Glion, Tusaun, Samedan e Scuol fa el fin a 20 000 valitaziuns per onn.

Fotografia:
-
Gion-Reto Hassler


Infurmaziuns:
cusseglier guvernativ dr. Christian Rathgeb, schef dal departament da finanzas e vischnancas, tel. 081 257 32 01, e-mail Christian.Rathgeb@dfg.gr.ch


Gremi: regenza
Funtauna: rg departament da finanzas e vischnancas
Neuer Artikel