L'exposiziun multimediala "Tut auter ch'in gieu d'uffants" mussa las consequenzas da guerra, da tortura e da fugia per l'emprima e per la segunda generaziun da fugitivas e fugitivs en Svizra. Sin iniziativa dal post spezialisà per l'integraziun sa ferma ella dals 16 da matg fin ils 15 da zercladur 2019 en la chasa Arcas a Cuira.

Actualmain ston blers umans bandunar lur patria pervia da guerra, violenza e persecuziun. Tge che quai signifitga per las persunas pertutgadas – umens, dunnas, uffants e giuvenils – vegn mussà en l'exposiziun ambulanta multimediala "Tut auter ch'in gieu d'uffants". Il project cuminaivel da la plattafurma interdisciplinara Face Migration e da la Crusch Cotschna Svizra ha accumpagnà pliras fugitivas e plirs fugitivs sco er lur famiglias – en il rom d'in studi da lunga durada – cun la finamira da mussar, co che l'experientscha da la fugia influenzescha lur vita e lur mintgadi en Svizra. En quest connex vegni cler, tge consequenzas che quai ha per l'integraziun sco er per els sco geniturs e co che la fugia influenzescha la vita da lur uffants. L'exposiziun porscha er spazi per il dialog virtual tranter persunas giuvnas ch'èn stadas en fugia e giuvenils en Svizra.

Viver en noss ravugl
Ils ultims 8 onns han 2184 fugitivas e fugitivs chattà refugi ed ina nova patria en il chantun Grischun. Tge savain nus da quests umans e tge influenza ha la fugia per lur vita en Svizra? L'exposiziun tematisescha quests umans, purtretescha persunas creschidas e giuvenils che discurran davart la fugia e davart lur experientschas respectivas. Quai ans dat la pussaivladad da prender invista dal mintgadi da persunas che vivan en noss ravugl e che han fatg experientschas nunditgas. "Tut auter ch'in gieu d'uffants" dat en quest senn a persunas interessadas la chaschun unica da sa fatschentar cun las consequenzas da guerra, da violenza, da tortura e da persecuziun. Betg mo teoreticamain, mabain en moda differenziada e persunala, ans pudain nus far in maletg, tge che la fugia e la perdita da la patria signifitga per persunas pertutgadas.

Ulteriuras infurmaziuns : la pagina d'internet da post spezialisà per l'integraziun


Infurmaziuns:
Patricia Ganter Sonderegger, incumbensada chantunala d'integraziun, telefon 081 257 36 81, e-mail: Patricia.Ganter@afm.gr.ch  


Gremi: uffizi da migraziun e da dretg civil / post spezialisà per l'integraziun
Funtauna: rg uffizi da migraziun e da dretg civil / post spezialisà per l'integraziun