Zum Seiteninhalt

Resultats dals examens d'admissiun per las scolas medias

Per bleras scolaras e blers scolars èn ils 12 da favrer ed ils 12 da mars 2019 stads dis spezials. Quels dus dis han gì lieu ils examens d'admissiun chantunals per entrar en ina scola media grischuna. Tut en tut han 508 giuvenils dumagnà l'admissiun ad ina da las nov scolas medias grischunas cun las partiziuns gimnasi, scola media commerziala e scola media spezialisada.

Quest onn èn sa preschentads 449 scolaras e 310 scolars (totalmain 759) als examens d'admissiun chantunals per entrar en la 1. u 3. classa gimnasiala d'ina scola media grischuna sco er en la 1. classa d'ina scola media commerziala u spezialisada. L'onn precedent eran quai totalmain 766 candidatas e candidats. Dals 508 giuvenils che han ademplì quest onn las cundiziuns d'admissiun èn 297 mattas e 211 mats. Tant la quota d'admissiun sco er la quota da success per entrar en in gimnasi grischun èn creschidas levamain cumpareglià cun l'onn precedent. Percunter è sa reducida la quota da success per l'admissiun a la 1. classa da la scola media commerziala u spezialisada.

Examen d'admissiun per la 1. classa gimnasiala
Totalmain 346 scolaras e scolars (2018: 348) respectivamain 185 mattas e 161 mats da la 6. classa da la scola primara èn sa preschentads ils 12 da favrer 2019 a l'examen d'admissiun chantunal per la 1. classa gimnasiala. Dals uffants da la scola primara che han fatg l'examen pon 115 mattas e 99 mats (totalmain 214 scolaras e scolars) entrar il proxim onn da scola en la 1. classa dal gimnasi da 6 onns (2018: 210). La quota da success importa 61,85 pertschient (62,16 pertschient tar las mattas e 61,49 pertschient tar ils mats). L'onn precedent ha ella importà 60,34 pertschient. Areguard il total da scolaras e scolars da la 6. classa primara (1631) importa la quota da giuvenils ch'èn vegnids admess a la 1. classa dal gimnasi da lunga durada 13,12 pertschient (2018: 13,02 pertschient tar 1613 scolaras e scolars da la 6. classa primara).

Examen d'admissiun per la 3. classa gimnasiala sco er per la 1. classa da la scola media commerziala u spezialisada

L'examen d'admissiun per la 3. classa gimnasiala sco er per la 1. classa da la scola media commerziala u spezialisada (examen unitar) è vegnì absolvì da totalmain 413 candidatas e candidats da la 2. u 3. classa da la scola secundara u en singuls cas er dal 10. onn da scola u d'in emprendissadi (2018: 418). Da quai eran 264 giuvenilas e 149 giuvenils.
Las premissas per entrar en la 3. classa dal gimnasi èn vegnidas ademplidas da 187 scolaras e scolars (2018: 182) respectivamain da 114 giuvenilas e da 73 giuvenils. La quota da success importa 45,28 pertschient (43,18 pertschient tar las scolaras e 48,99 pertschient tar ils scolars). L'onn passà ha ella importà 43,54 pertschient. La quota d'admissiun per entrar en la 3. classa gimnasiala importà 10,74 pertschient cumpareglià cun l'annada relevanta (2018: 10,52 pertschient).
Las cundiziuns d'admissiun per entrar en la 1. classa d'ina scola media commerziala u spezialisada èn vegnidas ademplidas da 107 candidatas e candidats (2018: 126) respectivamain da 68 scolaras e 39 scolars. Quai correspunda ad ina quota da success da 25,91 pertschient (25,76 pertschient tar las scolaras e 26,17 pertschient tar ils scolars). L'onn passà ha la quota da success importà 30,14 pertschient.


Infurmaziuns:

Regina Just Brodbeck, uffizi per la furmaziun media-superiura, manadra da la partiziun "scolas medias", tel. 081 257 61 69, e-mail: Regina.Just@ahb.gr.ch


Gremi: uffizi per la furmaziun media-superiura
Funtauna: rg uffizi per la furmaziun media-superiura