Zum Seiteninhalt

Siglientada da segirezza en la chavorgia da la Viamala

Directamain sur la gallaria Viamala  , var 100 meters avant il center da visita da la chavorgia da la Viamala, sa chatta in nas da grip pli grond ch'è instabil. L'uffizi da construcziun bassa disfa ussa cun ina siglientada controllada questa massa da grip ch'è periclitada da crudar giu. Uschia impedescha el la crudada smanatschanta e garantescha che las lavurs da reparaziun che cumenzan proximamain possian vegnir exequidas en segirezza.

L'uffizi da construcziun bassa renovescha en etappas il traject Viamala da la via taliana durant ils proxims quatter onns. En l'etappa da quest onn vegn renovada la gallaria Viamala 1 e la punt da Wildener istorica sco er disfatga la gallaria da lain ch'è vegnida construida l'onn 1996 sco stabiliment temporar per sviar il traffic da la via naziunala.

Concept da mesiras
Durant las lavurs da nettegiar e da segirar il spelm la fin da l'atun 2018 è vegnì constatà – ultra da las instabilitads localas dal spelm – er in nas da spelm pli grond ch'è instabil e che sa chatta mo paucs meters sur la gallaria da betun existenta Viamala 1. Ils scleriments geologics e geotecnics ch'èn silsuenter vegnids fatgs han mussà ch'i sto vegnir fatg quint cun ina crudada parziala u totala ils proxims decennis. En quest connex stoi vegnir fatg quint che la gallaria Viamala 1 vegniss donnegiada fermamain u destruida. Pervia da quai sto l'uffizi da construcziun bassa prender mesiras gia avant la renovaziun da la gallaria Viamala 1. Dal concept da mesiras discutà èsi resultà che la crudada smanatschanta sin la gallaria possia vegnir impedida mo cun ina siglientada da segirezza immediata per garantir uschia il medem mument che las lavurs da reparaziun che cumenzan proximamain possian vegnir exequidas senza privel. Il nas da grip da var 600 meters cubic, ch'è periclità da crudar giu, vegn disfatg cun ina siglientada controllada.

Andament da la siglientada

Las lavurs da preparaziun per la siglientada da segirezza èn vegnidas cumenzadas suenter Pasca. La siglientada è previsa per mesemna avantmezdi, ils 5 da zercladur 2019. Perquai ch'i po dar retardaments pervia da la topografia difficila, è l'avantmezdi da mesemna, ils 12 da zercladur 2019, vegnì fixà sco data da reserva. La siglientada vegn fatga en enclegientscha cun ils uffizis responsabels.

Aspects da segirezza
Pervia da la distanza da segirezza ch'è prescritta da la lescha na po la siglientada betg vegnir observada directamain. L'interpresa incumbensada vegn a registrar digitalmain la siglientada. Questas registraziuns vegnan – premess ch'ellas gartegian – messas a disposiziun a las medias sur il server FTP da la chanzlia chantunala (accessibel mo cun in pled-clav).

Agiunta:
broschura d'infurmaziun da l'uffizi da construcziun bassa davart la Viamala


Infurmaziuns:

- Reto Knuchel, inschigner chantunal, uffizi da construcziun bassa, tel. 081 257 37 01, e-mail Reto.Knuchel@tba.gr.ch
- Josef Kurath, manader da project per il mantegniment da las construcziuns artifizialas, uffizi da construcziun bassa dal Grischun, tel. 081 257 37 41, e-mail Josef.Kurath@tba.gr.ch


Gremi: uffizi da construcziun bassa
Funtauna: rg chanzlia chantunala