La regenza ha approvà in project da via voluminus a Scuol. Ultra da quai ha ella dà glisch verda per ina nova via da guaud a Rossa e per in project da protecziun cunter lavinas al Cuolm da Latsch.
Correcziun voluminusa da la via d'Engiadina a Scuol
La via d'Engiadina è l'axa da traffic la pli impurtanta da l'Engiadina. Il traject tranter la fin d'ost dal vitg da Scuol e la punt Son Valentin che maina sur la Val da Muglins è vegnì construì durant ils onns 1950. Dapi lura èn vegnidas fatgas mo lavurs da mantegniment u renovaziuns da tschertas pitschnas parts, uschia che la via è en in nausch stadi architectonic. Per ademplir las pretensiuns da norma actualas ha la regenza approvà in project d'exposiziun per la correcziun da la via d'Engiadina sin quest traject.
La correcziun da la via planisada prevesa da schlargiar la via sin ina ladezza constanta dal vial, cun spazis laterals e cun schlargiaments necessaris da las stortas. Perquai ston differents mirs da paraid e da sustegn vegnir renovads, engrondids u construids da nov. Da la vart da la val vegnan fatgas differentas novas construcziuns artifizialas. Ils custs totals dal project importan circa 16,2 milliuns francs.
©Uffizi federal da topografia
Nova via da guaud per la tgira dal guaud da protecziun a Rossa
La regenza ha approvà il project "Strada forestale Naucal" da la vischnanca da Rossa ed ha deliberà per la realisaziun ina contribuziun chantunala da maximalmain 237 000 francs. Cun quest project construescha la vischnanca ina via da guaud da 520 meters lunghezza ch'è charrabla per camiuns ed ina via d'access da 150 meters lunghezza che sa sparta da quella per l'Alp de Naucal.
Ils guauds en il territori dal project protegian ils vitgs Rossa ed Augio sco er la via chantunala cunter lavinas, crudada da crappa, sbuvadas, bovas ed aua gonda. L'avertura actuala da quests guauds n'è betg suffizienta. La racolta ed il transport da laina èn pussaivels mo cun helicopter e na pon perquai betg pli vegnir realisads en moda effizienta. Cun la construcziun da la via da guaud previsa po la tgira dal guaud da protecziun avair lieu en il futur en moda professiunala ed effizienta cun la crana a cabel.
©Uffizi federal da topografia
Protecziun cunter lavinas al Cuolm da Latsch
La regenza ha approvà il project "Protecziun cunter lavinas al Cuolm da Latsch" da la vischnanca da Bravuogn Filisur ed ha deliberà per quai ina contribuziun chantunala da maximalmain 544 000 francs. Pervia da la stippezza e pervia da l'exposiziun resulta a la flanca sidvest da la muntogna il problem relativamain grond da la naiv che glischna. La segirezza en ils abitadis da Latsch e da Stugl sco er da la via da colliaziun chantunala tranter questas duas fracziuns communalas duai vegnir augmentada. Perquai vegn il territori segirà cun differentas mesiras, sco chavalluts da trais chommas, emplantaziuns e rastels da naiv temporars. Il project vegn realisà en quatter etappas da construcziun e duai vegnir terminà fin l'onn 2022.
Hamilton dastga engrondir l'areal da la firma a Panaduz
La regenza ha approvà la revisiun parziala da la planisaziun locala che la vischnanca da Panaduz aveva concludì ils 10 da december 2018. Da quai resultan las basas giuridicas per l'engrondiment planisà da l'areal da la firma Hamilton SA. Al vest dal lieu da lavur "Vicrusch" vegn transferida per quest intent ina surfatscha da circa 4073 meters quadrat en la nova zona da plazzas da lavur "Vicrusch".
©Comet Photoshopping ScRL/ Dieter Enz
Gremi: regenza
Funtauna: rg chanzlia chantunala dal Grischun