Zum Seiteninhalt

Il zercladur salva il cussegl grond sia sessiun extra muros a Puntraschigna

Dals 11 fin ils 14 da zercladur 2019 salva il cussegl grond sia sessiun extra muros a Puntraschigna. Questa sessiun vegn actualmain preparada cun tutta forza.

Ina giada per legislatura salva il cussegl grond ina sessiun ordaifer Cuira. Questa sessiun extra muros ha ina gronda impurtanza per tgirar il contact cun la populaziun dal Grischun en las regiuns. Sin proposta da la conferenza da las presidentas e dals presidents ha il cussegl grond tschernì en la sessiun d'avrigl da l'onn passà Puntraschigna sco lieu da sessiun per la proxima sessiun extra muros. En il passà han gia gì lieu sessiuns extra muros a Mustér, a Tavau, a Landquart, a Puschlav, a Samignun ed ad Arosa. La sessiun a Puntraschigna dura sco usità tar sessiuns extra muros quatter dis, da mardi, ils 11 da zercladur, fin venderdi, ils 14 da zercladur 2019. La reuniun ha lieu en il center communal e da congress Rondo. La sala da congress da quest center vegn transfurmada per quatter dis en ina sala da cussegl. Il secretariat dal cussegl grond è vegnì incumbensà d'organisar questa sessiun. Actualmain vegnan las preparaziuns fatgas cun tutta forza. Per il program accumpagnant spezial durant la sessiun extra muros e per l'infrastructura tecnica necessaria al lieu procura la vischnanca ospitanta.

Program accumpagnant varià

Las deputadas ed ils deputads duain survegnir a Puntraschigna la pussaivladad d'emprender ad enconuscher pli bain la regiun e la populaziun. Per quest intent ha la vischnanca da Puntraschigna arranschà in program accumpagnant interessant e varià. Mardi, ils 11 da zercladur 2019, a las 14.00 vegn il cussegl grond beneventà da las represchentantas e dals represchentants communals en il center communal e da congress Rondo a Puntraschigna. La sessiun vegn alura averta uffizialmain a las 14.15 da la presidenta dal cussegl grond Tina Gartmann-Albin.
Ultra d'ina occurrenza facultativa la mesemna saira, che vegn accumpagnada d'in aperitiv cun participaziun da la populaziun indigena, è previs la gievgia saira in program accumpagnant uffizial per las parlamentarias ed ils parlamentaris si Muottas Muragl sut il motto "Sairada turistica".

Glista da tractandas bain emplenida

Er las sessiuns ordaifer l'edifizi dal cussegl grond servan en emprima lingia a la lavur parlamentara. Tranter auter stattan sin la glista da tractandas il quint dal chantun 2018 sco er ils rapports da gestiun da la dretgira chantunala e da la dretgira administrativa, da la cumissiun da surveglianza davart ils advocats, da la cumissiun da notariat e dals instituts autonoms da dretg public dal chantun. Ultra da quai vegn elegì il president da la regenza per l'onn 2020 ed ina substituziun per la dretgira da mesiras repressivas. Plinavant vegnan tractads il rapport da la regenza concernent l'optimaziun da l'organisaziun da las dretgiras chantunalas superiuras e numerusas intervenziuns parlamentaras. Sco usità èn las sesidas dal parlament publicas e persunas interessadas èn cordialmain envidadas da las persequitar davent d'ina tribuna.

Agiunta:
Flyer dal program per la sessiun extra muros a Puntraschigna


Infurmaziuns:
- presidenta dal cussegl grond Tina Gartmann-Albin, tel. 079 611 15 31
- Martin Aebli, president communal da Puntraschigna, tel. 079 332 05 65
- Domenic Gross, manader dal secretariat dal cussegl grond, tel. 081 257 22 32


Gremi: chanzlia chantunala dal Grischun
Funtauna: rg chanzlia chantunala dal Grischun