Il territori da Cuira duai vegnir engrondì per il 1. da schaner 2020 cun il territori da la vischnanca vischina da Maladers. Las votantas ed ils votants da Maladers han approvà cun 186 cunter 20 vuschs cleramain il contract da fusiun a chaschun da la radunanza communala dals 30 d'avust 2018. La votaziun a Cuira ha gì lieu ils 25 da november 2018 a l'urna. Er la populaziun da Cuira è sa decidida cun passa 80 pertschient da las vuschs affirmativas d'acceptar il contract da fusiun.
La fusiun da Cuira e da Maladers sto vegnir chapida en il connex dals svilups structurals en il Scanvetg. Per il 1. da schaner 2013 è entrada en vigur la fusiun da las otg anteriuras vischnancas Arosa, Calfreisen, Castiel, Langwies, Lüen, Molinis, Peist e St. Peter-Pagig. Las votantas ed ils votants da Maladers han decidì l'onn 2009 da vulair sa drizzar structuralmain vers Cuira. In'emprima emprova per in project è però vegnida sistida l'onn 2012.
Var 500 novas abitantas e novs abitants da Cuira
La fusiun qua avant maun sto vegnir qualifitgada sco incorporaziun da Maladers en la citad da Cuira. Cuira surpiglia tut las relaziuns giuridicas da la vischnanca da Maladers ed il dretg municipal da Cuira mantegna sia valaivladad per la vischnanca fusiunada. Ils relaschs giuridics da Maladers vegnan abolids cun paucas excepziuns, cur che la fusiun entra en vigur. Cun la fusiun s'engrondescha il dumber da 35 000 persunas che vivan a Cuira per las var 500 abitantas ed abitants da Maladers.
Fusiun sco schliaziun da problems
La fusiun schlia differents problems per la vischnanca orasum il Scanvetg che cunfinescha cun Cuira. En spezial ha Maladers mussà adina pli savens difficultads da chattar persunas adattadas per sias autoritads communalas. Or d'ina vista surordinada po ultra da quai vegnir mess in ulteriur crap da mosaic sin il maletg d'ina futura cuntrada da vischnancas en la regiun Plessur.
La contribuziun da promoziun chantunala che la regenza ha garantì per la fusiun da la citad da Cuira cun la vischnanca da Maladers importa 3,7 milliuns francs. Il cussegl grond vegn a tractar la missiva en la sessiun d'avust. Cun questa fusiun sa reducescha il dumber da vischnancas ad anc 105 per il 1. da schaner 2020.
Agiunta:
missiva
Infurmaziuns:
cusseglier guvernativ dr. Christian Rathgeb, schef dal departament da finanzas e vischnancas, tel. 081 257 32 01, e-mail
Christian.Rathgeb@dfg.gr.ch
Gremi: regenza
Funtauna: rg departament da finanzas e vischnancas