Navigaziun principala

Cuntegn da la pagina

Communicaziun da la regenza dals 20 da zercladur 2019

  • Erste Mitteilung
  • Neuen Beitrag einfügen
La regenza ha prendì posiziun tar la revisiun parziala da l'ordinaziun federala davart la promoziun da l'energia ed ha approvà la revisiun parziala da l'ordinaziun chantunala davart il vin. Ultra da quai ha ella dà glisch verda per in project per construir rempars en la Moesa a Grono.

La regenza beneventa da rinforzar la producziun d'electricitad cun forza idraulica l'enviern

La regenza ha prendì posiziun tar la revisiun da l'ordinaziun federala davart la promoziun da l'energia. Cun promover pli intensivamain ovras electricas d'accumulaziun duai vegnir dà impuls per spustar la producziun d'electricitad cun forza idraulica da la stagiun da stad sin la stagiun d'enviern. La finamira da rinforzar la producziun d'electricitad durant l'enviern beneventa la regenza da princip. Las prognosas actualas mussan numnadamain, ch'i pudessan resultar il plitgunsch stretgas tar la producziun d'electricitad durant l'enviern, sche la producziun d'electricitad cun ovras nuclearas crudass davent. L'onn 2031 vegnan questas contribuziuns d'investiziun planisadas dentant ad ir a fin. Perquai pretenda la regenza da prevair – en il rom da la proxima revisiun da la lescha federala davart il provediment d'electricitad – mecanissems che garanteschan la segirezza per far investiziuns a lunga vista per producir electricitad cun forza idraulica. La finamira sto esser quella da sustegnair la forza idraulica sco pitga principala da nossa producziun d'electricitad neutrala al clima, sch'i resultan cundiziuns dal martgà difficilas. Mo uschia po la forza idraulica ademplir la rolla centrala che la vegn attribuida en la Strategia d'energia 2050. 

Documents da consultaziun DATEC

La regenza approvescha la revisiun parziala da l'ordinaziun chantunala davart il vin
La regenza ha approvà la revisiun parziala da las disposiziuns executivas tar l'ordinaziun davart la viticultura e l'import da vin (ordinaziun chantunala davart il vin). Dapi lur revisiun totala dals 27 da favrer 2018 è il dretg federal puspè sa midà, quai che pretenda danovamain adattaziuns. Per exempel po – tenor l'ordinaziun federala midada – il dretg chantunal fixar valurs maximalas pli autas per il volumen d'alcohol total che las prescripziuns dal dretg federal per enritgir vins AOC. Questa pussaivladad vegn tratga a niz en l'ordinaziun chantunala davart il vin. Plinavant duai la revisiun parziala permetter d'introducir pass per pass il traffic commerzial electronic cun las singulas possessuras e cun ils singuls possessurs da manaschis, per exempel per registrar las surfatschas da vignas u las datas da las vendemias. La revisiun parziala qua avant maun vegn messa en vigur per il 1. da fanadur 2019.

La Moesa a Grono daventa pli segira en cas d'auas grondas

La regenza ha approvà in project per construir rempars en la Moesa a Grono cun intginas cundiziuns e permissiuns. La confederaziun ed il chantun sa participeschan a la finanziaziun cun contribuziuns per la correcziun dals curs d'aua. La contribuziun federala importa 192 500 francs e la contribuziun chantunala 110 000 francs. Cun il project per la correcziun dal curs d'aua vegn er protegida la via taliana H13. Il chantun Grischun sa participescha perquai supplementarmain cun ina contribuziun per la construcziun da vias da 24 750 francs.
In'examinaziun dal privel d'aua gronda en la vischnanca da Grono ha mussà che la Moesa chaschuna ina ristga considerabla. Il project per la correcziun dal curs d'aua prevesa d'auzar la riva dretga dal flum per 1 fin 2 meters, e quai sin ina lunghezza da circa 550 meters. Per quest intent vegn il rempar existent da la riva rinforzà cun in rempar da terra. Las surfatschas da quests rempars duain vegnir concepidas en moda uschè natirala sco pussaivel.
-
©Uffizi federal da topografia

Posiziun tar las petiziuns da la sessiun dals giuvenils
La regenza grischuna è s'occupada da la sessiun dals giuvenils dal Grischun 2019. L'avrigl èn sa fatschentads circa 30 giuvenils durant 2 dis activamain cun l'avegnir dal chantun. Suenter debattas detagliadas ha il plenum concludì la finala nov pretensiuns ch'èn vegnidas surdadas al president da la regenza preschent e silsuenter a la chanzlia chantunala. Las pretensiuns concernan ils secturs energia ed ambient, furmaziun e scolaziun sco er la participaziun da la giuventetgna. En il rom d'ina communicaziun al comité d'organisaziun da la sessiun dals giuvenils prenda la regenza posiziun davart tut las propostas dals giuvenils.

posiziun


Gremi: regenza
Funtauna: rg chanzlia chantunala dal Grischun
Neuer Artikel