Zum Seiteninhalt

20 onns centrala dal clom d'agid sanitar 144 dal Grischun

Il 1. da fanadur 1999 ha la centrala dal clom d'agid sanitar cumenzà cun ses manaschi a Glion. Dapi lura han var 800 000 persunas che han telefonà al clom d'agid survegnì agid svelt che ha savens er salvà vitas en situaziuns d'urgenza. A chaschun dal giubileum duai vegnir fatg endament il clom d'agid sanitar 144.

En situaziuns d'urgenza quinta mintga minuta, ina intervenziun svelta e senza disturbis po numnadamain salvar vitas. Dapi 20 onns alarmeschan e coordineschan las collavuraturas ed ils collavuraturs da la centrala dal clom d'agid sanitar en cas d'urgenza ils meds d'intervenziun e da salvament necessaris e cusseglian las persunas che tschertgan agid e cussegl en dumondas medicinalas d'urgenza. Er l'intermediaziun da medias e da medis da servetsch, da dentistas e da dentists d'urgenza, d'oculistas e d'oculists d'urgenza sco er d'apotecas per cas d'urgenza tutgan tar lur incumbensas.

Dapi ils 7 da november 2017 parta la centrala dal clom d'agid sanitar 144 dal Grischun las localitads cun la centrala d'acziuns da la polizia chantunala. Grazia a la stretga collavuraziun pon vegnir tratgas a niz sinergias, optimads andaments e coordinads anc meglier la sanitad, la polizia ed ils pumpiers. 11 collavuraturas e collavuraturs garanteschan cuminaivlamain – en servetschs da di e da notg durant 24 uras – il manaschi da la centrala dal clom d'agid sanitar dal Grischun.

Cun meds auxiliars tecnics sin il stadi il pli actual
Ultra da persunal bain scolà èn decisivs er meds auxiliars tecnics per in manaschi effectiv ed efficazi da la centrala d'alarm. Dapi il november 2017 dovra la centrala dal clom d'agid sanitar 144 dal Grischun sco emprima e suletta en Svizra il sistem per diriger las acziuns PELIX©, ch'era vegnì sviluppà oriundamain per acziuns da la polizia. Dapi l'onn 2017 lavura la centrala dal clom d'agid sanitar 144 GR cun l'app per smartphones Echo112. En cas d'urgenza transmetta questa app sin l'entir mund la posiziun da la possessura u dal possessur dal telefonin al servetsch d'urgenza local. L'app gratuita Echo112 po vegnir chargiada giu dal App Store u da Google Play.

En cas d'urgenza 144 – di e notg en tut la Svizra

Mintgina e mintgin po vegnir en ina situaziun d'urgenza. Per pudair gidar svelt e tenor plan èsi impurtant da restar calm e da respunder a la centrala per cas d'urgenza sco emprim las dumondas Tgi? Nua? Tge? Quantas persunas? Tgi è al telefon, nua sa chatta il cas d'urgenza, tge è capità e quantas persunas èn involvidas. Per persunas pertutgadas, ma er per persunas che gidan èsi quietant da savair, che al numer d'urgenza 144 è persunal medicinal scolà professiunalmain che dat instrucziuns al telefon per l'emprim agid, che las accumpogna durant la situaziun d'urgenza e che organisescha tut il necessari. La centrala dal clom d'agid 144 dal Grischun stat a disposiziun di e notg a la populaziun grischuna per tut ils cas d'urgenza medicinals ed er psicosocials. En cas da dubi vala: pli gugent clamar ina giada memia bler che memia pauc. In fegl d'infurmaziun per cas d'urgenza stat a disposiziun sin www.144.gr.ch.


Infurmaziuns:

- cusseglier guvernativ Peter Peyer, schef dal departament da giustia, segirezza e sanadad, tel. 081 257 25 01, e-mail Peter.Peyer@djsg.gr.ch  


Gremi: departament da giustia, segirezza e sanadad
Funtauna: rg departament da giustia, segirezza e sanadad