Navigation

Inhaltsbereich

  • Erste Mitteilung
  • Neuen Beitrag einfügen
La regenza augmenta las contribuziuns da stipendis e promova la cultivaziun da chonv per victualias. Plinavant duain vegnir schliadas las incaricas da prestaziun cun la KJBE concernent la cussegliaziun per mammas e per babs.

Schliaziun da la cunvegna da prestaziun concernent la cussegliaziun per mammas e per babs
La regenza terminescha las incaricas da prestaziun tranter il chantun Grischun e l'uniun per tgira d'uffants cumplementara a la famiglia (KJBE) concernent la realisaziun da la cussegliaziun per mammas e per babs. Il departament da giustia, segirezza e sanadad (DGSS) vegn incumbensà da chattar cun la KJBE in'enclegientscha per ina schliaziun anticipada consensuala da las incaricas da prestaziun. Plinavant duai il DGSS elavurar la reorganisaziun da la cussegliaziun per mammas e per babs en il chantun.
Pervia da discordanzas cuntinuantas en l'organisaziun da la cussegliaziun per mammas e per babs ha il DGSS incaricà la fin da favrer 2019 la firma da cussegliaziun independenta Conaptis ScRL cun sedia a Turitg da far in'analisa fundada da la situaziun actuala tar la cussegliaziun per mammas e per babs dal chantun Grischun. Il rapport extern vegn a la conclusiun che la situaziun sa laschia meglierar mo tras in nov cumenzament visibel. Er tut las partidas involvidas giavischan ina restructuraziun. Perquai vegnan las incaricas da prestaziun existentas terminadas anticipadamain. Las relaziuns da lavur duain vegnir transferidas tenor pussaivladad en ina nova soluziun.

Ils stipendis en il chantun Grischun vegnan auzads

La regenza ha approvà la revisiun parziala da l'ordinaziun tar la lescha davart las contribuziuns da scolaziun (ordinaziun da stipendis). Uschia pon las contribuziuns da stipendis vegnir auzadas.
La retschertga 2016 da l'uffizi federal da statistica davart la situaziun sociala ed economica da las studentas e dals students ha mussà ch'ils custs per studentas e students èn s'augmentads en media per circa 17 pertschient dapi l'onn 2005. En spezial ils custs d'alloschi (+ 24%), da sanadad (+ 32%) e da transport (+ 37%) èn creschids massivamain. L'onn 2005 importavan las expensas d'ina persuna en scolaziun, che n'abita betg en la chasa dals geniturs, 23 640 francs per onn. L'onn 2016 importavan ils custs annuals da nov 27 840 francs. Tras l'adattaziun da tschertas posiziuns vegn ussa resguardà quest svilup dals custs. Sin fundament da las dumondas da stipendis inoltradas per l'onn da scolaziun 2017/18 è vegnida fatga ina calculaziun da model che mussa expensas supplementaras annualas da circa 1,5 milliuns francs per il chantun. Sa basond sin il dumber da persunas che han retratg stipendis l'onn 2017 e resguardond las novas persunas che retiran stipendis, importass in stipendi da nov en media var 5600 francs (2017: 5100 francs).

Il chantun promova la cultivaziun da chonv per victualias
Per promover la cultivaziun, l'elavuraziun e la commerzialisaziun da chonv per victualias en il Grischun ha la regenza garantì ina contribuziun chantunala da maximalmain 390 000 francs a la AlpenPionier SA per ils onns 2019–2021. Als manaschis grischuns participads al project vegnan pajads 1200 francs per hectara sco cumpensaziun per ils pajaments directs mancants. Sin basa da la legislaziun actuala en Svizra n'exista – per la cultivaziun da chonv – nagin dretg da contribuziuns sut il titel da la cultivaziun biologica dad ers. Cun ina midada respectiva da la pratica – vul dir cun in dretg da contribuziuns per la cultivaziun da chonv per victualias – pon ins far quint il pli baud l'onn 2022 cun la Politica agrara 22+.
L'interpresa giuvna AlpenPionier SA cun sedia a Tschiertschen-Praden ha prendì en mira da metter il focus sin ils avantatgs multifars dal chonv per la sanadad umana, per l'agricultura e per l'ambient e d'als nizzegiar per la creaziun da valurs localas. Cun quest project pudess il Grischun surpigliar sin plaun naziunal ina rolla da piunier impurtanta en l'agricultura ed en la producziun da victualias. La quota grischuna da passa 62 pertschient da manaschis che produceschan tenor directivas biologicas – ina quota unica en la cumparegliaziun svizra – è ina da las meglras premissas en quest connex.

-

Sustegn finanzial per il project "100% Valposchiavo"
Per il project "100% (bio) Valposchiavo" ha la regenza deliberà ina contribuziun chantunala da maximalmain var 3,43 milliuns francs. Quai sut la premissa ch'er la confederaziun concedia ina contribuziun al project cuminaivel per il svilup regiunal (PSR). La tariffa da contribuziun da la confederaziun per projects PSR importa 40 pertschient dals custs totals imputabels. Uschia resulta ina contribuziun federala da circa 4,3 milliuns francs.
Il project cumpiglia tranter auter la realisaziun d'in nov center d'elavuraziun per fritga da maisa e per pumaraida sco er in indriz da sientar ervas, la revalitaziun dal lieu da vendita da la chascharia en il vitg per products da "100% (bio) Valposchiavo", l'amplificaziun d'ina mazlaria biologica, la realisaziun d'in center da rimnada per graun, l'installaziun d'ina producziun d'ovs biologics, l'amplificaziun d'ina orticultura e d'ina mazlaria da liongias ("mazziglia" puschlavina) sco er l'endrizzament d'ina chascharia sin in bain puril a Viano. In product po survegnir il logo "100% Valposchiavo", sch'il product sez (en cas da materias primas sco latg, charn, fritgs e verdura e.u.v.) u tut sias ingredienzas (en cas da products cumponids sco liongias, jogurt, rauba da pasta e.u.v.) derivan dal Puschlav.

-

Il sistem da preavertiment en la Val Bondasca resta
La regenza ha dà glisch verda al project "Sistem da preavertiment Bondasca 2020–2024" da la vischnanca da Bregaglia e concedì ina contribuziun chantunala da maximalmain 1,1 milliuns francs per quest project. Il project stat en connex cun la crudada da crappa devastanta al Piz Cengalo la stad 2017 che aveva chaschunà immediatamain in flum da glera e bovas. La via chantunala sco er entiras parts dals abitadis da Bondo, Promontogno, Sottoponte e Spino eran vegnidas sutterradas dal material. Il sistem da preavertiment ch'era installà a Prä ha funcziunà en moda irreproschabla, è dentant vegnì destruì per part tras las bovas.
En il rom da las mesiras immediatas è quest sistem vegnì reconstruì e cumplettà. Il matg 2018 ha la regenza approvà la transfurmaziun dal sistem da preavertiment davent dal manaschi provisoric en il manaschi permanent. Questa transfurmaziun ha er cumpiglià adattaziuns dals indrizs. La fasa da manaschi è l'emprim vegnida restrenschida sin ils onns 2018 fin 2019. Ils giudicaments actuals dals privels mussan ch'i èn pussaivlas ils proxims onns ulteriuras crudadas da grippa e da crappa al Piz Cengalo ed ulteriuras bovas or da la Val Bondasca. Ultra da quai na po in flum immediat da glera betg vegnir exclus per il mument en cas d'ina proxima crudada da grippa. Pervia da quai vegni cuntinuà cun il sistem da preavertiment almain fin l'onn 2024.

-

Project collectiv 2019 per la selvicultura
La regenza ha approvà il project collectiv per la selvicultura 2019 cun custs totals da 23,97 milliuns francs. Il project è vegnì elavurà en collavuraziun cun var 200 proprietarias e proprietaris da guauds publics e privats. Sin totalmain 2985 hectaras vegn mantegnì il guaud da protecziun, promovida la diversitad da las spezias e tgirà il guaud giuven. Ultra da quai vegnan fatgs tagls da laina en territoris che n'èn betg bain accessibels. Finanzià vegn quest project tras meds da la confederaziun, dal chantun sco er da las proprietarias e dals proprietaris dals guauds pertutgads.

-


Gremi: regenza
Funtauna: rg chanzlia chantunala dal Grischun
Neuer Artikel