Zum Seiteninhalt

Il Tirol dal sid surdat il presidi da la ARGE ALP a Salzburg

Ils pajais da la ARGE ALP vulan rinforzar il territori rural e transferir il traffic sin la viafier. Quai ha concludì la 50. conferenza da las scheffas e dals schefs da las regenzas cun duas resoluziuns.

La 50. conferenza da la cuminanza da lavur da las regiuns alpinas (ARGE ALP) ha celebrà oz a Toblach il punct culminant e la finiziun dal presidi d'in onn dal Tirol dal sid. Il guvernatur Arno Kompatscher ha surdà il timun ussa al guvernatur da Salzburg, Wilfried Haslauer.

A questa chaschun èn las scheffas ed ils schefs da las regenzas s'occupads da plirs temas impurtants per la populaziun da las Alps: Las regiuns alpinas han deliberà ina resoluziun davart il tema central da l'onn presidial dal Tirol dal sid, il "svilup dal territori rural", ed ina resoluziun davart il traffic transalpin.

Tschintg tesas ed in film per il territori rural
Sco resultat da l'occupaziun cun il tema central han las regiuns alpinas pronunzià tschintg tesas. Quellas han la finamira da garantir e da sviluppar il territori rural sco spazi da viver, da lavur, economic, cultural, da recreaziun e sco territori natiral d'auta qualitad. En connex cun il tema "lavur" duain sa manifestar furmas da lavur sco smart-working e telelavur alternanta. Las administraziuns publicas surpiglian qua ina funcziun d'exempel, ed in attatg a bindel lad en tut las regiuns alpinas è la premissa fundamentala per quai. Las regiuns alpinas vulan – sco segund – rinforzar ils ciclus economics regiunals, la valurisaziun per ils manaschis e la capacitad da cumpra dal territori rural sco er las interpresas pitschnas e mesaunas. Sco terz chapeschan ellas la fermezza dal territori rural en la coesiun da la populaziun. Sco quart duai il maun public garantir l'accessibladad adequata e senza barrieras al territori rural.

La finala sa tracti da la qualitad da viver, tranter auter grazia a vias curtas per tut las generaziuns als servetschs dal provediment da basa, a la tgira d'uffants, a la furmaziun ed a las purschidas culturalas.
Questas tesas èn er resumadas en in nov film che fa in'excursiun tras las regiuns alpinas. El è vegnì mussà per l'emprima giada a la conferenza e po vegnir guardà er sin la pagina www.argealp.org.

Traffic: Da la via sin la viafier
Ina segunda resoluziun è s'occupada dal tema "traffic". Las scheffas ed ils schefs pretendan l'autenticitad dals custs tranter la via e la viafier, quai per render pli attractiv da transferir il traffic sin la viafier. Anc adina existia "ina gronda differenza da pretschs tranter las duas modas da transport", hai num en la resoluziun.

Pluriling e concis: La ARGE ALP ha ina nova cumparsa en l'internet
La ARGE ALP en furma concisa – cun ina tschertga ed ina navigaziun simpla, cun texts actuals e cun bellas fotografias: Quai porscha la nova pagina d'internet da la ARGE ALP (www.argealp.org). Ella è vegnida dada libra oz en il rom da la conferenza da las scheffas e dals schefs da la ARGE ALP a Toblach.

Fotografia:
-
Las scheffas ed ils schefs da la cuminanza da lavur da las regiuns alpinas (ARGE ALP)


Infurmaziuns:
- cusseglier guvernativ dr. Christian Rathgeb, schef dal departament da finanzas e vischnancas, tel. 081 257 32 01, e-mail Christian.Rathgeb@dfg.gr.ch (el telefona lura enavos)
- dumondas da las medias per telefon: Tamara Freuler, incumbensada per l'infurmaziun dal chantun Grischun, tel. 079 792 19 37


Gremi: cuminanza da lavur da las regiuns alpinas (ARGE ALP)
Funtauna: cuminanza da lavur da las regiuns alpinas (ARGE ALP)