Zum Seiteninhalt

Communicaziun da la regenza dals 8 da fanadur 2019

La regenza ha prendì posiziun davart la midada da sistem che la confederaziun ha planisà per l'imposiziun da taglia sin la proprietad d'abitar. Ultra da quai ha ella approvà dus projects da vias.

La regenza refusa la midada da sistem per l'imposiziun da taglia sin la proprietad d'abitar
La regenza ha prendì posiziun davart la midada da sistem che la confederaziun ha planisà per l'imposiziun da taglia sin la proprietad d'abitar. L'imposiziun da taglia sin la valur da l'atgna locaziun duai vegnir abolida per proprietad d'abitar per l'agen diever al domicil, uschia ch'i crodan davent er las deducziuns respectivas (custs dal mantegniment da l'immobiglia e per part ils tschains da debits). Per las immobiglias secundaras che servan a l'agen diever vegn mantegnida l'imposiziun da taglia sin la valur da l'atgna locaziun tala e quala.
Tenor la regenza grischuna è l'imposiziun da taglia sin la valur da l'atgna locaziun cun deducziun dals custs da mantegniment e dals tschains da debits commensurada e buna. Quella pudess vegnir remplazzada mo tras in sistem che resguarda il tractament egual da proprietari e locatari e che garantescha las entradas fiscalas dals chantuns e da las vischnancas cun ina gronda quota d'abitaziuns secundaras. Tenor l'avis da la regenza n'ademplescha la midada da sistem proponida betg questas premissas, perquai ch'i n'è betg vegnida chattada ina soluziun adequata per deducir ils tschains da debits. La proposta da la confederaziun avess per consequenza ch'ils tschains da debits sin l'immobiglia al domicil vegnissan da nov deducids da la valur da l'atgna locaziun da l'immobiglia secundara, quai che chaschunass perditas da taglia considerablas per il chantun e per las vischnancas. Pervia da quai spetga la regenza grischuna la renunzia a la midada da sistem u ina nova audiziun tar ina meglra proposta da soluziun.

Consultaziuns da las cumissiuns parlamentaras

Siglientada artifiziala da lavinas senza helicopter a Zernez
Il traject da la via d'Engiadina tranter Brail e Zernez è periclitada tras tut en tut 11 laviners. Tenor las retschertgas dal WSL Institut per la perscrutaziun da la naiv e da las lavinas (SLF) vegn la via sutterrada il pli savens en il sectur dals dus laviners Tantervals Dadaint e Tantervals Dadoura. La via vegn segirada cun ina siglientada artifiziala da lavinas. Fin ussa vegnivan las lavinas siglientadas en la zona da distatga cun chargias explosivas che vegnivan bittadas or da helicopters. La siglientada cun agid dal helicopter ha dentant intgins dischavantatgs.
Per quest motiv ha la regenza approvà il project "Siglientada artifiziala da lavinas Tantervals" da l'uffizi da construcziun bassa. Quel permetta da siglientar lavinas en l'avegnir cun indrizs fixs sur la cuverta da naiv. Il project duai esser terminà l'onn 2020. Ils custs vegnan calculads cun 750 000 francs.

-

Ina via da guaud impurtanta en la Val Calanca vegn renovada
La regenza ha approvà il project "Potenziamento strada forestale Nadro – Castaneda" da la vischnanca da Castaneda. Tras quest project duai vegnir renovà in traject da circa 1,6 kilometers da la via da guaud tranter Nadro e Castaneda. Tschertas parts da la via èn vegnidas construidas gia ils onns 1830. Ella era la suletta via d'access da la Val Calanca. Oz è la via serrada per il traffic general e vegn duvrada sco via da guaud. Ella ha ina gronda impurtanza per la tgira dal guaud da protecziun, per il mantegniment d'in rempar da protecziun cunter crudada da crappa e dals rempars d'aual en il Ria di Mort sco er per la prevenziun cunter incendis da guaud. Ultra da quai serva ella sco pussaivladad da sviament, sche la via chantunala da la Val Calanca sto vegnir serrada. La regenza ha concedì ina contribuziun chantunala dad 1,3 milliuns francs per quest project.

-

Vasta correcziun da la via da Tschiertschen
Per la correctura da la via da Tschiertschen tranter Usser Prada e la punt dal Grossagentobel ha la regenza approvà in project da via. Ils custs per la renovaziun importan circa 4,9 milliuns francs. La punt a la fin dal traject da project è en in bun stadi e vegn mantegnida. La via percunter vegn sanada vastamain e schlargiada ad ina ladezza dal vial da 5,8 meters. Cun il standard tschernì vegn augmentada la segirezza dal traffic e dal manaschi da la via da colliaziun, e la circulaziun dal traffic vegn meglierada.

-
©Uffizi federal da topografia

Mess en vigur duas leschas
La regenza ha concludì las suandantas entradas en vigur:
- La lescha davart las scolas medias en il chantun Grischun (lescha davart las scolas medias) vegn messa en vigur per il 1. d'avust 2019. Ultra da quai relascha la regenza las ordinaziuns respectivas davart pajaments da contribuziuns e taxas sco er davart las chasas da dimora en ils fatgs da scola media. Cun la revisiun totala da la lescha davart las scolas medias vegn creada la basa per permetter als giuvenils grischuns vinavant ina scolaziun decentrala en ina scola media. Il chantun duai pudair intervegnir ad ura, sche per exempel ina scola media privata na po betg pli cuntinuar cun ses manaschi ord atgna forza. Plinavant vegn creada la basa legala per ch'il chantun possia pajar ina contribuziun pauschala a scolaras e scolars grischuns ch'èn collocads en ina chasa da dimora d'ina scola media privata.
- La revisiun parziala da la lescha da taglia per il chantun Grischun e da la lescha davart las taglias communalas e davart las taglias da baselgia vegn messa en vigur per il 1. da schaner 2021. Cun questa revisiun parziala vegnan las taglias communalas e chantunalas sin l'ierta e sin donaziuns unifitgadas, tras quai ch'il chantun mida da la taglia sin il relasch a la taglia sin la part d'ierta. Sco consequenza da questa midada ston las vischnancas adattar lur leschas communalas da taglia. Pervia da quai vegn la revisiun parziala messa en vigur pir l'onn 2021.


Gremi: regenza
Funtauna: rg chanzlia chantunala dal Grischun