Sin invit dal consul general svizzer dr. Urs Hammer ha gì lieu ils 2 d'avust a Francfurt al Main in bainvegni a chaschun da la festa naziunala. Var 350 giasts han suandà l'invit a la festa naziunala en la citad la pli gronda dal pajais federativ Hessen. Il chantun Grischun, envidà sco chantun ospitant, è vegnì represchentà dal cusseglier guvernativ Marcus Caduff. L'occurrenza è vegnida enramada musicalmain da differentas artistas e da divers artists grischuns e preschentada da Beat Antenen.

Davant ils giasts envidads da la politica, da l'economia e da la cultura da Hessen sco er davant represchentants d'interpresas svizras da la regiun ha cusseglier guvernativ Marcus Caduff menziunà en ses salid ils puncts cuminaivels tranter il pajais federativ Hessen ed il chantun Grischun: in element colliant è il Rain. El ha sia funtauna en il Grischun e furma per passa 100 kilometers il cunfin sidvest dal pajais federativ Hessen.

Heidi collia il Grischun cun Francfurt
Cun Heidi, la figura romanesca da renum mundial, datti er in liom litterar tranter il Grischun e Fancfurt. En sia funcziun sco minister grischun dal turissem ha cusseglier guvernativ Marcus Caduff profità da l'occasiun per render attractiva ina visita en la patria da Heidi als giasts preschents. Cun ina quota da var 16 pertschient èn ils Tudestgs la gruppa da giasts la pli impurtanta per il chantun Grischun.

Il Grischun marchescha preschientscha
La preschentaziun dal Grischun sco chantun ospitant al bainvegni a Francfurt al Main è vegnida realisada en collavuraziun cun Grischun vacanzas e cun singuls furniturs da prestaziuns turisticas sco la Viafier retica. Ultra dal giudiment da differents vins dal Grischun han las persunas preschentas er pudì sa persvader da la qualitad da las spezialitads grischunas. Uschia è la gronda gruppa da giasts vegnida pupragnada tranter auter cun la turta da nuschs bain la pli pitschna dal mund. Per il divertiment musical han procurà la pianista e chantadura Cinzia Regensburger, la solista da tiba Valentina Oswald sco er la band a capella INVIVAS.

Infurmaziuns:
cusseglier guvernativ Marcus Caduff, schef dal departament d'economia publica e fatgs socials, tel. 081 257 23 01, e-mail Marcus.Caduff@dvs.gr.ch


Gremi: departament d'economia publica e fatgs socials
Funtauna: rg departament d'economia publica e fatgs socials