Zum Seiteninhalt

Terminà cun success la renovaziun da l'edifizi dal cussegl grond

  • Erste Mitteilung
  • Neuen Beitrag einfügen
L'ultima etappa da la renovaziun da l'edifizi dal cussegl grond è vegnida terminada a temp per il cumenzament da la sessiun d'avust. Ultra da lavurs da renovaziun vi da las installaziuns tecnicas è vegnì adattà architectonicamain il plaun sut il tetg a las pretensiuns d'ozendi. D'admirar datti er in'ovra d'art dad Alois Carigiet acquistada da nov, ina skizza tar la pictura da paraid en la sala dal cussegl grond.

Dapi 10 onns vegnì profità da las sessiuns extra muros dal cussegl grond per far las lavurs da construcziun necessarias vi da l'edifizi dal cussegl grond. L'onn 2009 (sessiun extra muros a Puschlav) è vegnì construì in access senza obstachels che permetta a persunas cun e senza impediments d'arrivar sin la medema via en l'edifizi dal parlament. L'onn 2012 (sessiun extra muros a Samignun) è vegnì installà in sistem da votaziun electronic sco er – sin basa d'in concept general – realisada l'emprima etappa da la renovaziun da la sala dal cussegl grond. L'onn 2015 (sessiun extra muros ad Arosa) è vegnì endrizzà in local da medias en il plaun sut il tetg.

La renovaziun è vegnida terminada en etappas
L'ultima etappa da la renovaziun ch'è ussa terminada, ha cumpiglià essenzialmain la finiziun da las installaziuns tecnicas sco electricitad, stgaudament, climatisaziun e ventilaziun. Sut l'entira surfatscha dal tetg è vegnida plazzada da nov ina isolaziun termica. Las stanzas da scolaziun e da sesidas ch'eran ordinadas fin ussa en moda flexibla en il plaun sut il tetg, èn vegnidas disponidas da nov e munidas cun apparats audiovisuals. A medem temp è vegnida meglierada l'acustica ed installada ina illuminaziun che spargna energia. In local da segiurn cun ina nova concepziun serva a tut las utilisadras ed ils utilisaders da l'edifizi.

Il sectur da la recepziun e dal secretariat en il plaunterren, che serva al manaschi parlamentar durant las sessiuns, ha survegnì – pervia da prescripziuns tecnicas da la protecziun cunter incendis – ina concepziun dal tuttafatg nova che correspunda a las pretensiuns da las utilisadras e dals utilisaders. En l'entir edifizi èn vegnidas renovadas las installaziuns da segirezza resguardond las disposiziuns e prescripziuns legalas.

Il sboz da Carigiet tar la pictura da paraid
Ultra da la terminaziun da las lavurs da renovaziun han ins pudì realisar in'ulteriura revalitaziun da l'edifizi dal cussegl grond. Sin proposta dal deputà Bruno Claus ha il chantun Grischun profità da l'occasiun per acquistar ina skizza detagliada e formulada tar la pictura da paraid "L'uniun da las Trais Lias, 1959" dad Alois Carigiet en l'edifizi dal cussegl grond. Alois Carigiet (1902–1985) è in dals artists ils pli enconuschents e populars dal Grischun. Ultra da natiras mortas, da vistas da vitgs e da motivs figurativs ha el chattà ina incumbensa artistica en las picturas da paraid per incumbensaders publics e privats, che l'han occupà durant lungas fasas da sia vita. L'exempel il pli prominent è la pictura da paraid enorma da 6 x 14 meters per l'edifizi dal cussegl grond dal chantun Grischun, ch'el ha terminà l'onn 1961 e la quala mussa in sper l'auter differents eveniments istorics sco singulas scenas en uniun formala. Cun questa pictura da paraid ha Alois Carigiet chattà ina soluziun moderna per preschentar l'istorgia dal Grischun. La cumpra e la preschentaziun da la skizza en proxima vischinanza da la pictura da paraid en l'edifizi dal cussegl grond accentueschan l'impurtanza artistica da questa ovra e salvan in document impurtant da l'istorgia dals origins per la publicitad.

Fotografias agiuntadas:
-
Il sboz da Carigiet tar la pictura da paraid

- Las stanzas da scolaziun e da sesidas en il plaun sut il tetg
- Il sectur da la recepziun e dal secretariat en il plaunterren
- Local da segiurn cun ina nova concepziun


Infurmaziuns:
- president da la regenza, dr. Jon Domenic Parolini, tel. 081 257 27 01, e-mail Jondomenic.Parolini@ekud.gr.ch
- cusseglier guvernativ dr. Mario Cavigelli, tel. 081 257 36 01, e-mail Mario.Cavigelli@bvfd.gr.ch


Gremi: uffizi da construcziun auta
Funtauna: rg uffizi da construcziun auta
Neuer Artikel