La regenza grischuna ha nominà Fernando Guntern sco nov manader da l'uffizi chantunal da persunal. El vegn a surpigliar questa funcziun il 1. da schaner 2020.

La regenza grischuna ha elegì Fernando Guntern, electroinschigner SAS, EMBA General Management, sco nov manader da l'uffizi da persunal. Fernando Guntern ha 51 onns, è burgais da Goms ed abita a Domat. El ha lavurà en differentas branschas en il svilup da software, avant ch'el ha midà avant 19 onns tar la controlla chantunala da finanzas dal Grischun. Là ha el cumenzà sco revisur. Dapi l'onn 2007 è el manader da partiziun. Actualmain è Guntern vicemanader da la controlla da finanzas dal Grischun. El daventa successur da Riccardo Thöni che ha bandunà l'administraziun chantunala.

L'uffizi da persunal dal Grischun è il post chantunal spezialisà per dumondas da persunal. Sco uffizi interdisciplinar s'occupa el da tut ils 39 posts da servetsch e secretariats dals departaments da l'administraziun chantunala dal Grischun. El emetta mintga onn passa 900 contracts da lavur e passa 55 000 rendaquints da salari. Ultra da las incumbensas centralas sco recrutaziun, scolaziun e furmaziun supplementara, management dals salaris e da las uras sco er dretg da persunal stat l'uffizi da persunal mintga di en il servetsch da superiuras e da superiurs sco er da collavuraturas e collavuraturs.
 
Fotografia agiuntada:

Infurmaziuns:
cusseglier guvernativ dr. Christian Rathgeb, schef dal departament da finanzas e vischnancas, tel. 081 257 32 01, e-mail Christian.Rathgeb@dfg.gr.ch


Gremi: regenza
Funtauna: rg chanzlia chantunala