Navigation

Inhaltsbereich

  • Erste Mitteilung
  • Neuen Beitrag einfügen
A temp per il cumenzament da l'onn da scola èn cumparids en la retscha da meds d'instrucziun "mediomatix" ulteriurs meds d'instrucziun da lingua en ils idioms puter, sursilvan, sutsilvan e vallader, ch'èn accordads cun il nov plan d'instrucziun. Damai ch'ils meds d'instrucziun per la 2. classa dal stgalim primar e per la 3. classa dal stgalim secundar I vegnan gia duvrads en il mintgadi da scola, stattan da nov a disposiziun er quels per la 3. classa dal stgalim primar sco er per la 2. classa dal stgalim secundar I.

Ils novs meds d'instrucziun da lingua analogs e digitals per la scola populara obligatorica en ils idioms puter, sursilvan, sutsilvan e vallader vegnan elavurads da la scola auta da pedagogia dal Grischun per incumbensa dal chantun Grischun.

Ovra d'instrucziun cun quatter cudeschs da lavur
Per l'onn da scola 2019/20 èn ussa disponiblas er las ovras d'instrucziun cumplettas per la 3. classa dal stgalim primar sco er per la 2. classa dal stgalim secundar I. Per idiom e per classa cumpiglia l'ovra d'instrucziun quatter cudeschs da lavur per las scolaras ed ils scolars sco er in commentari per la persuna d'instrucziun che ha er quatter parts. Il commentari per las persunas d'instrucziun è avant maun sco cudesch digital e po vegnir chargià giu sco PDF en cas da basegn. Ils cudeschs da lavur datti tant en ina furma stampada sco er en ina furma digitala, sco e-books, per l'utilisaziun en scola. Supplementarmain èn las grammaticas da scola didactisadas vegnidas repassadas. Er ellas stattan da nov a disposiziun sco e-books.

Accordà cun il Plan d'instrucziun 21 e cun ils idioms
Ils cuntegns dals meds d'instrucziun èn accordads cun il Plan d'instrucziun 21 Grischun e pussibiliteschan ina instrucziun moderna en ils idioms. Ultra d'in concept cuminaivel suror tut ils idioms, dat il med d'instrucziun tar il cuntegn er gronda paisa a particularitads idiomaticas. Uschia èn ils cudeschs da lavur dals quatter idioms bain concepids en moda unitara ed han in cuntegn ch'è fitg sumegliant – ma betg identic.

Il diever dals meds d'instrucziun è vegnì declerà da la regenza sco "obligatoric" per l'onn da scola 2019/20. Las parts da l'ovra d'instrucziun pon vegnir empustadas tar ils Meds d'instrucziun dal Grischun (www.lmv.gr.ch).

Las proximas publicaziuns en il rom dal project da meds d'instrucziun "mediomatix" èn previsas per l'onn da scola 2020/21. Fin quest termin vegnan a cumparair ils meds d'instrucziun per la 4. classa dal stgalim primar e per la 1. classa dal stgalim secundar I. Ulteriuras infurmaziuns davart il project da meds d'instrucziun sa chattan sin la pagina d'internet www.mediomatix.ch.

Fotografia agiuntada:
-


Infurmaziuns:

- Rico Cathomas, manader dal project mediomatix, scola auta da pedagogia dal Grischun, tel. 078 625 75 75, e-mail Rico.Cathomas@phgr.ch
- Josy Marie Künzler, manadra dal sectur meds d'instrucziun, uffizi per la scola populara ed il sport, tel. 081 257 22 61, e-mail Josy.Kuenzler@avs.gr.ch


Gremi: uffizi per la scola populara ed il sport
Funtauna: rg uffizi per la scola populara ed il sport
Neuer Artikel