Navigation

Inhaltsbereich

  • Erste Mitteilung
  • Neuen Beitrag einfügen
La regenza ha prendì posiziun tar las midadas planisadas da la confederaziun concernent la lescha davart la protecziun da l'ambient. Ultra da quai ha ella approvà posteriuramain las mesiras d'urgenza ch'èn vegnidas prendidas suenter la crudada da grippa en la vischnanca da Valsot.

Auters spazis da viver, auters neobiotics
La regenza ha prendì posiziun tar las midadas planisadas en la lescha federala davart la protecziun da l'ambient. Il project dal departament federal per ambient, traffic, energia e communicaziun (DATEC) recumonda da stgaffir basas legalas per prevegnir, per cumbatter e per survegliar organissems exotics invasivs. En spezial duain vegnir prendidas mesiras al cunfin da la Svizra sco er reglada l'obligaziun d'annunzia e da cumbat. Er duain persunas privatas pudair vegnir obligadas da prender tschertas mesiras da cumbat sin lur bain immobigliar u da tolerar talas mesiras.
La regenza beneventa da princip la direcziun dal project. Neobiotics n'enconuschan nagins cunfins chantunals. Pervia da quai po vegnir cuntanschì in manaschament efficazi cunter neobiotics mo cun ina coordinaziun centrala. A la regenza manca però l'integraziun dals chantuns ed ella crititgescha il focus ch'è vegnì mess memia ferm sin singulas spezias. Als spazis da viver specifics regiunals stoi vegnir dà ina impurtanza bler pli gronda. Tut tenor la regiun èn organissems exotics invasivs avant maun en moda fitg differenta en ils differents spazis da viver sco palids, guauds u auas. Ina differenziaziun correspundenta sto vegnir fatga dals chantuns.

Consultaziun dal departament federal per ambient, traffic, energia e communicaziun (DATEC)

Approvà posteriuramain il project per mesiras d'urgenza suenter la crudada da grippa
La regenza ha approvà posteriuramain in project da l'uffizi da construcziun bassa per mesiras d'urgenza suenter la crudada da grippa dals 16 da mars 2019 tranter Martina e Vinadi. Material da circa 1600 meters cubic è sa distatgà ed è ruschnà giu sin la via d'Engiadina. En quest connex èn in pèr blocs rudlads sur la via ora e crudads en l'En. La via d'Engiadina è stada cuvrida sin ina lunghezza da circa 20 meters cun grippa d'ina autezza da var 8 meters. Quest eveniment ha chaschunà – ultra dals donns vi da la via – er anc auters donns considerabels. Il mir da la vart da la muntogna è vegnì ruinà sin plirs meters ed in conduct da fibras da vaider sco er il conduct da tensiun media per il Samignun èn vegnids donnegiads.
Per pudair restabilir la protecziun da la via d'Engiadina èn vegnidas iniziadas immediatamain mesiras d'urgenza. Perquai è vegnida rumida davent grippa e la costa è vegnida segirada. Ils custs totals dal project han importà var 400 000 francs. -

Gremi: regenza
Funtauna: rg chanzlia chantunala dal Grischun
Neuer Artikel