Zum Seiteninhalt

Chaschiel d'alp – tradiziun, culinarica, artisanadi

  • Erste Mitteilung
  • Neuen Beitrag einfügen
Gia per la 20avla giada ha lieu la premiaziun annuala dal chaschiel d'alp grischun. Il chaschiel d'alp ch'è vegnì producì durant questa stad sin las alps grischunas cun chascharia vegn degustà, taxà e premià. La giuria spezialisada sa cumpona da represchentantas e represchentants da l'agricultura e da l'economia da latg sco er da la politica e da la gastronomia.

Il chaschiel d'alp collia tradiziun, culinarica ed artisanadi sco nagina autra victualia. Dapi il temp dals Romans vegn fatg il chaschiel retic (d'alp) ed uschia conservà il latg. Grazia al pavel spezial per il muvel da latg sco er a las metodas da producziun artisanalas survegn il chaschiel d'alp ses gust spezial.

Las finamiras da la premiaziun dal chaschiel d'alp grischun èn tranter auter quellas d'augmentar en moda persistenta la qualitad dal chaschiel d'alp indigen e da promover l'impurtanza dal chaschiel d'alp. Ultra da quai duai l'occurrenza esser in lieu d'inscunter e da barat per il persunal d'alp e per las persunas interessadas.

La premiaziun dal chaschiel d'alp grischun da quest onn ha lieu venderdi, ils 20 da settember 2019, en l'arena grischuna a Cazas. La taxaziun dal chaschiel d'alp vegn fatga da las 17.00 fin las 20.00. La communicaziun dals resultats da la taxaziun è previsa per las 22.00. Durant la festa, averta a partir da las 16.00 per tut las visitadras e visitaders, procura Tom Solèr e sia squadra d'ustaria da muntogna per il bainstar corporal. A partir da las 20.30 procuran ils "Starke Mander" per in'atmosfera da festa en l'arena grischuna.

I vegnan spetgads signunas e signuns da var 90 alps sco er var 500 visitadras e visitaders.

Agiuntas:
Fegliet infurmativ davart il chaschiel d'alp grischun
Fegliet infurmativ davart la premiaziun dal chaschiel d'alp grischun
Fegl sgulant davart la premiaziun dal chaschiel d'alp grischun

Fotografia agiuntada:
-
Squadra d'alp cun ses chaschiel d'alp


Infurmaziuns:
Töni Gujan, post spezialisà per economia d'alp, Plantahof, tel. 081 257 60 85, e-mail Toeni.Gujan@plantahof.gr.ch  


Gremi: Plantahof
Funtauna: rg Plantahof
Neuer Artikel