Zum Seiteninhalt

Introducziun dal portal da furmaziun professiunala per manaschis d'emprendissadi

Suenter ch'ina fasa da test è vegnida realisada cun success, surdat l'uffizi per la furmaziun professiunala il portal da furmaziun professiunala a partir dals 24 da settember 2019 al manaschi productiv. En l'avegnir pon ils manaschis d'emprendissadi uschia inoltrar ils contracts d'emprendissadi per l'approvaziun online e senza midar medium.

Ensemen cun sis auters chantuns e cun il principadi da Liechtenstein ha l'uffizi per la furmaziun professiunala (UCFP) acquistà in portal online per manaschis d'emprendissadi. En il decurs da la primavaira 2019 han 11 manaschis d'emprendissadi en il Grischun fatg tests positivs cun quest portal da furmaziun professiunala. A partir dals 24 da settember 2019 ha lieu l'implementaziun, uschia ch'ils manaschis d'emprendissadi pon far il suandant online:

  • endatar contracts d'emprendissadi
  • inoltrar contracts d'emprendissadi per l'approvaziun
  • inoltrar prolungaziuns da contracts d'emprendissadi
  • inoltrar schliaziuns da contracts d'emprendissadi
  • prender invista da datas da contracts d'emprendissadi ed elavurar talas
  • endatar ed adattar datas davart furmaturas e furmaturs da la professiun
  • inoltrar dumondas per permissiuns da furmaziun
  • modifitgar datas per l'indicatur da las plazzas d'emprendissadi libras (www.berufsberatung.ch).

Las infurmaziuns d'annunzia correspundentas vegnan dentant anc tramessas per posta als manaschis d'emprendissadi. Cun il portal da furmaziun professiunala vegnan augmentadas la qualitad e la transparenza da las datas ed accelerads ils process. Ils manaschis d'emprendissadi ed il UCFP pon administrar las datas dals manaschis d'emprendissadi sco er da las emprendistas e dals emprendists e communitgar in cun l'auter independentamain dal temp. Plinavant vegn reducì il consum da palpiri. En spezial il process da l'approvaziun dal contract d'emprendissadi vegn adattà e reproducì en furma digitala grazia al portal da furmaziun professiunala. Il UCFP examinescha gia in'ulteriura extensiun dal portal. En quest connex èsi per exempel previs da desister da l'annunzia en scrit per l'examen final d'emprendissadi.

lteriuras infurmaziuns chattais Vus sut www.berufsbildung.gr.ch.

Infurmaziuns:
Walter Järmann, manader da la partiziun "surveglianza da la furmaziun professiunala" e vicemanader da l'uffizi per la furmaziun professiunala, tel. 081 257 27 65, e-mail Walter.Jaermann@afb.gr.ch

Gremi: uffizi per la furmaziun professiunala
Funtauna: rg uffizi per la furmaziun professiunala