Zum Seiteninhalt

Dis publics en il stabiliment giudizial Cazas Tignez

La fin d'emna dals 19 e dals 20 d'october 2019 ha la populaziun interessada la pussaivladad da dar in sguard davos il mir dal nov stabiliment giudizial serrà (praschun) Cazas Tignez.

Avant che la nova praschun Cazas Tignez cumenza, suenter ina fasa da test, cun ses manaschi il schaner 2020, po la populaziun interessada sa persvader dal fatg ch'il chantun Grischun presta – cun questa nova praschun – ina contribuziun impurtanta a favur da la segirezza publica e dal meglierament da la situaziun d'execuziun. Las visitadras ed ils visitaders survegnan infurmaziuns davart l'incumbensa che l'execuziun giudiziala sto ademplir. Els vesan, co che quella è vegnida realisada architectonicamain, e chapeschan, en tge ambient ch'ils arrestads vegnan a passentar lur mintgadi d'execuziun a partir dal schaner 2020.

Annunzia necessaria sur la plattafurma online
Per pudair stimar las capacitads dal di e per pussibilitar a las visitadras ed als visitaders in access ed ina tura segirs, è necessaria in'annunzia. L'ultim termin d'annunzia è ils 10 d'october 2019.

Sin la pagina d'internet inditgada qua sutvart pon las persunas interessadas annunziar sasezzas ed ulteriuras persunas accumpagnantas: www.publikumstage-cazis-tignez.gr.ch  

Segirezza ha l'emprima prioritad
Cun l'annunzia vegni confermà a medem temp ch'ins ha prendì enconuschientscha da las infurmaziuns da segirezza publitgadas sin la pagina d'internet. Mintga persuna annunziada sto preschentar ses bigliet e sia carta d'identitad per survegnir access a la praschun. Uschia vala per exempel in scumond da telefonins, ed igl è er scumandà da purtar cun sai tastgas u satgados. Las visitadras ed ils visitaders vegnan guidads tras la praschun sur ina ruta marcada.

Co arrivar a l'occurrenza
Perquai ch'i na stattan a disposiziun naginas plazzas da parcar tar la praschun Cazas Tignez, vegnan las visitadras ed ils visitaders supplitgads da prender il traffic public. Per quest intent vegn offrida la purschida speziala "simpel per retour" davent d'in lieu en il Grischun fin Razén (davent da la staziun da Razén curseschan bus pendulars gratuits) u fin a la staziun da Roten-Realta (senda). Sin l'areal da l'arena grischuna stat a disposiziun in dumber limità da plazzas da parcar. Tranter quest areal e la praschun curseschan medemamain bus pendulars gratuits. Dapli infurmaziuns davart l'arrivada ed ulteriuras infurmaziuns davart ils dis da visita datti sin la pagina d'internet: www.publikumstage-cazis-tignez.gr.ch

Fotografia agiuntada:
-
©Mathias Kunfermann, Tusaun


Infurmaziuns:
Jürg Räber, manader da project "manaschi", uffizi per l'execuziun giudiziala dal Grischun, tel. 081 257 52 73, e-mail Juerg.Raeber@ajv.gr.ch  


Gremi: uffizi per l'execuziun giudiziala
Funtauna: rg uffizi per l'execuziun giudiziala