Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna ha nominà dunna dr. Chantal Marti-Müller sco nova manadra da l'uffizi chantunal per la scola populara ed il sport. Ella vegn a surpigliar questa funcziun il 1.  a matg 2020.

Chantal Marti-Müller ha 47 onns e lavura actualmain sco prorectura a la scola auta da pedagogia dal Grischun (SAPGR). Il matg 2020 daventa ella successura da Dany Bazzell che va en pensiun suenter in'activitad da 16 onns sco manader da l'uffizi.

Suenter avair terminà il seminari da magisters grischun ha Chantal Marti-Müller absolvì la scolaziun da magistra da gimnastica e da sport a la SPF Turitg ed ha alura promovì en pedagogia suenter in segund studi a l'universitad da Turitg. Suenter avair obtegnì il diplom per l'instrucziun superiura ha ella terminà ses studi da pedagogia a l'universitad da Turitg cun la dissertaziun davart il tema "Scola populara dal Grischun sut l'ensaina da midadas. Acturs – furmaziun da persunas d'instrucziun – surveglianza da scola". Suenter ha ella absolvì il studi CAS "leadership e governance a scolas autas".

Dapi l'onn 2004 lavura Chantal Marti-Müller a la SAPGR sco pedagoga cun accent sin didactica ed er sco docenta da sport e moviment en la scienza ed en la perscrutaziun. L'onn 2007 è Chantal Marti-Müller vegnida elegida sco commembra da la direcziun da la scola auta e dapi l'onn 2014 sco prorectura da la SAPGR. Tras sias funcziuns directivas sco prorectura, commembra da la direcziun da la scola auta e manadra da partiziun ha Chantal Marti-Müller cumprovà sia cumpetenza da manar glieud. Ella discurra tudestg e rumantsch ed ha medemamain enconuschientschas dal talian, dal franzos e da l'englais.

En il sectur da la scola procura l'uffizi per la scola populara ed il sport (USS) ch'ils fatgs da las scolinas, da las scolas popularas e da las scolas spezialas en il chantun Grischun vegnian manads e promovids en il senn da las leschas correspundentas. En il sectur dal sport intimescha il USS la populaziun, en spezial ils giuvenils – cun purschidas da sport en las scolas ed en las uniuns da sport – d'esser activs corporalmain, da viver en moda sauna e da s'integrar socialmain. Plinavant garantescha il USS la coordinaziun e l'interdependenza tranter las persunas e las instituziuns ch'èn activas en il sport.

Fotografia agiuntada:
-
Dunna dr. Chantal Marti-Müller, nova manadra da l'uffizi per la scola populara ed il sport


Infurmaziuns:
president da la regenza Jon Domenic Parolini, schef dal departament d'educaziun, cultura e protecziun da l'ambient, tel. 081 257 27 12, e-mail Jondomenic.Parolini@ekud.gr.ch


Gremi: regenza
Funtauna: rg departament d'educaziun, cultura e protecziun da l'ambient
Neuer Artikel