Zum Seiteninhalt

La consula generala da la republica da la Tirchia sin visita tar la regenza grischuna

La consula generala tirca, Asiye Nurcan İpekçi, ha visità oz il chantun Grischun sin invitaziun da la regenza.

La consula generala da la republica da la Tirchia, Asiye Nurcan İpekçi, è vegnida beneventada oz en il chastè da Haldenstein dal president da la regenza Jon Domenic Parolini e dal chancelier Daniel Spadin. Asiye Nurcan İpekçi è vegnida accumpagnada dal consul Mehmet Yüceer. Suenter il barat dals salids uffizials è in gentar cuminaivel stà sin il program.

La regenza grischuna tgira annualmain contacts cun represchentantas e represchentants da stadis esters en Svizra. Ils discurs èn elements impurtants da las relaziuns externas dal chantun. Cun ils stadis vischins e cun ils pajais che han relaziuns spezialas cun la Svizra e cun il Grischun vegnan discutadas savens dumondas specificas actualas. Autras visitas servan en emprima lingia a barattar experientschas sin il champ cultural, economic e politic.

Fotografia agiuntada:
-
La consula generala Asiye Nurcan İpekçi, accumpagnada dal consul Mehmet Yüceer (a dretga), vegn beneventada en il chastè da Haldenstein dal president da la regenza Jon Domenic Parolini (segund da sanestra) sco er dal chancelier Daniel Spadin (a sanestra).

Gremi: regenza
Funtauna: rg chanzlia chantunala