Ils 14 da november 2019 encuraschescha il Di da l'avegnir las mattas ed ils mats da planisar la professiun e la vita en moda averta ed independentamain da la schlattaina. Anc adina restrenschan ils giuvenils lur tscherna da professiun pervia da rollas tradiziunalas. Per promover il barat da las rollas organisescha il chantun Grischun ina concurrenza da video – il team victur survegn 1000 francs per la cassa da classa..

Ils 14 da november 2019, al Di naziunal da l'avegnir, scuvran mattas e mats professiuns ed activitads, en las qualas lur schlattaina è sutrepreschentada. Ils giuvenils vegnan encuraschads d'examinar tut il spectrum da perspectivas professiunalas e persunalas per l'avegnir e da metter en dumonda las rollas. Il Di da l'avegnir ha la finamira da motivar las mattas ed ils mats uschè baud sco pussaivel per ina tscherna averta da la professiun.

Sche la tscherna da professiun è restrenschida, crescha la mancanza da persunas spezialisadas
En Svizra pon ils giuvenils tscherner tranter var 250 emprendissadis. A medem temp crescha la dumonda per persunas spezialisadas adattadas. Ma anc adina restrenschan ils giuvenils fermamain lur tscherna da professiun, perquai ch'els sa laschan diriger da las rollas tradiziunalas empè dals agens interess e da las atgnas fermezzas. Uschia ha la mesadad da las giuvnas tschernì l'onn 2016 in emprendissadi en ina da tschintg professiuns dal sectur social e da sanadad. En spezial per mattas mancan exempels feminins – tant en professiuns dominadas dad umens sco er en posiziuns da cader. Ed er per mats na datti strusch exempels masculins en uschenumnadas tipicas professiuns da dunnas.

Gist quai è l'impuls per il Di da l'avegnir: En il program da basa, nua che las mattas ed ils mats accumpognan persunas da referiment a la lavur, stat il barat da las rollas en il center. En ils projects spezials vegn il focus mess sapientivamain sin professiuns tipicas per las schlattainas, en las qualas sa mussa ina mancanza da persunas spezialisadas.

Concurrenza da video cun in premi da 1000 francs
En il Grischun organisescha il post da stab per l'egualitad da las schanzas ina concurrenza da video. Da gudagnar datti 1000 francs per la cassa da classa. Scolaras e scolars documenteschan en dus – cun in video curt – lur barat da las rollas al Di da l'avegnir. Per lur creativitad na datti nagins cunfins – la finamira è quella da preschentar il barat da las rollas en moda uschè infurmativa e divertenta sco pussaivel.

Ils megliers videos vegnan preschentads ils 12 da december 2019 a chaschun da la surdada dal premi e lura publitgads. Sin www.chancengleichheit.gr.ch èn cuntegnidas tut las infurmaziuns impurtantas davart la concurrenza e sut www.nationalerzukunftstag.ch chattan ins tut davart il Di da l'avegnir.


Infurmaziuns
Nicolas Zogg, collavuratur scientific, post da stab per l'egualitad da las schanzas, Tel. 081 257 35 73, E-Mail Nicolas.Zogg@stagl.gr.ch


Gremi: post da stab per l'egualitad da las schanzas
Funtauna: rg post da stab per l'egualitad da las schanzas