Zum Seiteninhalt

La cursa d'orientaziun da la ARGE ALP vegn organisada a Savognin

  • Erste Mitteilung
  • Neuen Beitrag einfügen
Ils 12 e 13 d'october 2019 han lieu a Savognin las cursas d'orientaziun (CO) da la ARGE ALP. Var 700 sportistas e sportists da las regiuns da la ARGE ALP Baviera, Lumbardia, Salzburg, Son Gagl, Tessin, Tirol, Tirol dal sid, Trentino e Grischun sco er da las regiuns ospitantas Baden-Württemberg e Turgovia sa mesiran en differentas categorias. Per incumbensa da graubündenSPORT èn la federaziun grischuna da cursas d'orientaziun e la gruppa da CO da Cuira responsablas per l'organisaziun.

Suenter che l'occurrenza è stada l'ultima giada giast en l'Engiadina l'onn 2009, sa scuntran las sportistas ed ils sportists questa giada en il Surses. Sonda, ils 12 d'october a las 13.00 ha lieu la festa d'avertura en vischinanza da la staziun da muntogna Parsonz Tigignas. Suenter han lieu las cursas da stafetta en il territori da cursa Tigignas. Las cursas singulas cumenzan dumengia a partir da las 9.30 en il territori Got Grond cun il center da concurrenza sur Salouf. La proclamaziun dals rangs ha lieu mintgamai a la fin da mintga di da cursa.

Grond success da las concurrenzas da sport en ils pajais da las Alps
Las concurrenzas da sport annualas da la ARGE ALP èn fitg popularas. Il project curunà da success vegn manà da l'uffizi per la scola populara ed il sport dal chantun Grischun. Las concurrenzas han lieu decentralmain en ils pajais commembers da la ARGE ALP. Pervia dal grond success dal project è la conferenza da las scheffas e dals schefs da las regenzas da la ARGE ALP s'exprimida l'onn 2017 a favur d'ina cuntinuaziun da las concurrenzas fin l'onn 2022. Ils gieus d'enviern cumpiglian mintgamai ski alpin, hockey sin glatsch e patinadi artistic. Durant il semester da stad suondan ballape, in turnier da ballape per persunas cun impediments, tir da sport, atletica leva, cursa d'orientaziun sco er raiver sportiv.

La cuminanza da lavur da las regiuns alpinas
La ARGE ALP ha l'intent d'approfundar la conscienza dad esser responsabel per il spazi da viver alpin e da sviluppar vinavant questa conscienza en moda persistenta per il bain da las abitantas e dals abitants. A la cuminanza da lavur, ch'è vegnida fundada l'onn 1972 en il Tirol, appartegnan diesch pajais federativs, regiuns e chantuns da quatter stadis. Commembers èn ils chantuns svizzers Grischun, Son Gagl e Tessin, ils pajais federativs austriacs Salzburg, Tirol e Vorarlberg, il pajais federativ tudestg Baviera sco er las regiuns talianas Tirol dal Sid, Trentino e Lumbardia. Presidiada vegn la ARGE ALP mintgamai per in onn d'in da ses commembers. Actualmain è quai Salzburg.

Remartgas:
Ulteriuras infurmaziuns: www.argealp-sport.org


Infurmaziuns:
Beat Tschalèr, uffizi per la scola populara ed il sport, graubündenSPORT, tel. 081 257 27 56, e-mail Beat.Tschaler@avs.gr.ch


Gremi: uffizi per la scola populara ed il sport
Funtauna: rg uffizi per la scola populara ed il sport
Neuer Artikel