Zum Seiteninhalt

Communicaziun da la regenza dals 24 d'october 2019

  • Erste Mitteilung
  • Neuen Beitrag einfügen
La regenza ha surdà l'incumbensa da manar la "marca graubünden" per ils onns 2020 fin 2022. Plinavant ha la regenza approvà il transferiment da concessiuns dal dretg da las auas en il Partenz.

Cuntinuitad en connex cun manar il secretariat "marca graubünden"
Dapi l'onn 2017 vegn manà il secretariat "marca graubünden" da la Clerezza ScRL, Flem, ina filiala da la Quant SA, Flem. La regenza ha surdà l'incumbensa da manar il secretariat "marca graubünden" per ils onns 2020 fin 2022 a la Quant SA, Flem. Per simplifitgar sia structura d'interpresa ha la Quant SA decidì da serrar sia filiala Clerezza ScRL per la fin da l'onn 2019. Cun questa decisiun da prolungar il mandat accentuescha la regenza la cuntinuitad en l'ulteriur svilup dal project curunà da success "marca graubünden".
La regenza sa basa uschia er sin la via instradada fin ussa en direcziun da la "marca graubünden" sco marca dal lieu. L'idea da la marca "NaturMetropole der Alpen" (metropola natirala da las Alps) stat per ina spessa accumulaziun d'aventuras d'auta qualitad en la natira ed en la cultura, che caracteriseschan, distinguan e differenzieschan il Grischun da ses concurrents. Ultra dal turissem èn las tematicas strategicas, nua ch'il chantun vul sa posiziunar pli fitg, tranter auter la mobilitad, il giudiment e la regiunalitad, la furmaziun e la perscrutaziun ubain l'innovaziun ed ils talents. Uschia po il Grischun vegnir percepì pli fitg er sco spazi da viver e da lavurar attractiv.

Approvà il transferiment da las concessiuns dal dretg da las auas da la Repower a la Repartner
La regenza ha approvà il transferiment da las concessiuns per il Lai da Tavau, per il Schlappin e per la Landquart, che appartegnan a las ovras dal Partenz, da la Repower SA (Repower) a la Repartner Produktions SA (Repartner). En il Partenz maina la Repower las ovras electricas Claustra, Schlappin e Küblis. Las trais ovras electricas han ina producziun mesauna annuala d'energia da 232 uras da gigawatt. La Repartner è ina societad da participaziun e da producziun che ha la finamira da prestar ina contribuziun per obtegnair a lunga vista ed en moda progressiva la segirezza dal provediment en Svizra. La Repower è l'acziunaria da maioritad ed apporta sia cumpetenza professiunala da la producziun e dal commerzi en quest partenadi.

Schlargiament da la via da Stels sur Schiers
La regenza ha approvà in project per ina correcziun da la via da Stels sur Schiers sin il traject tranter Fajauna e Mittlist Maji. Ils custs totals per las lavurs sin il traject da via d'ina lunghezza da stgars dus kilometers èn budgetads cun circa 14 milliuns francs. En quest sectur è la via da Stels fitg stretga e na correspunda betg pli als basegns actuals, pervia da sia limitaziun ad ina ladezza maximala da 2,3 meters ed ad in pais maximal da 13 tonnas. Perquai prevesa il project da schlargiar la via a 4,2 meters. Il traject cumenza circa 300 meters sur la fracziun da Fajauna e finescha a Mittlist Maji. Cun schlargiar la via e cun construir novas zonas da guntgida vegni ad esser pussaivel en il futur da cruschar sin la via.

-
©Uffizi federal da topografia

Glisch verda per in project da correcziun dal curs d'aua en la vischnanca da Cunter en il Partenz
La regenza ha approvà cun intginas cundiziuns il project da rempars per il Wissbach en la vischnanca da Cunter en il Partenz. La confederaziun ed il chantun sa participeschan a la finanziaziun cun contribuziuns per la correcziun dals curs d'aua. La contribuziun federala importa 70 000 francs e la contribuziun chantunala 40 000 francs.
En il rom da las inspecziuns periodicas ha la vischnanca da Cunter en il Partenz constatà ch'in rempar che sa chatta sut la via Cafrida, ha donns architectonics. La via Cafrida collia l'abitadi central da Cunter cun ils territoris "Übertobel" e "Cafrida", ed è ina colliaziun communala da traffic d'impurtanza locala, che traversa il Wissbach sin ina punt. Il rempar lavà orasut e donnegià sto vegnir reparà per impedir donns consecutivs vi da la punt e vi da ses conturns. Il project prevesa da construir da nov il fundament da betun e d'endrizzar ina protecziun da la riva cun crappa da bloc.

-


Gremi: regenza
Funtauna: rg chanzlia chantunala dal Grischun
Neuer Artikel