Zum Seiteninhalt

Communicaziun da la regenza dals 14 da november 2019

  • Erste Mitteilung
  • Neuen Beitrag einfügen
Il Grischun vegn a sa participar sco giast d'onur a la OLMA 2022. Plinavant ha la regenza approvà la renovaziun da la punt sur la Plessur a Sassal sco er in project da protecziun cunter crudada da crappa a San Vittore.

Il Grischun sco giast d'onur a la OLMA 2022

Il chantun Grischun vegn a sa participar sco giast d'onur a la OLMA 2022 a Son Gagl. Quai sin invitaziun dal chantun Son Gagl. Uschia ha il Grischun la pussaivladad da sa mussar ad in vast public da sia vart tradiziunala, ma a medem temp er da sia vart moderna sco chantun da lavur, chantun turistic e chantun agricul. Il departament d'economia publica e fatgs socials ha survegnì l'incarica da concepir, da planisar e da realisar la preschentaziun chantunala.
La OLMA è la fiera publica la pli gronda da la Svizra. En l'entira Svizra tudestga ha ella ina gronda impurtanza. La OLMA è in'occurrenza cun ina ferma attracziun economica, culturala e politica. La fiera svizra per agricultura e nutriment dura 11 dis ed attira mintga onn var 350 000 visitadras e visitaders. La fiera vegn averta tradiziunalmain d'ina commembra u d'in commember dal cussegl federal e sveglia ina gronda attenziun mediala en la Svizra tudestga. L'ultima giada è il Grischun stà l'onn 2003 chantun d'onur a la OLMA. Gia ils onns 1974 e 1985 era il Grischun sa preschentà sco giast a la OLMA. -
©Olma Messen St.Gallen

La punt sur la Plessur a Sassal vegn renovada

La regenza ha approvà il project "Correcziun da la punt sur la Plessur a Sassal" sin la via da Meiersboden. Ils custs da construcziun importan circa 2,35 milliuns francs. La via da Meiersboden collia Cuira cun la fracziun Meiersboden, che tutga a la vischnanca da Churwalden. Tras quest project da via vegn remplazzada la punt sur la Plessur a Sassal en il lieu actual. Grazia ad ina via pli lada ed ad in'optimaziun dal trassé vegnan meglieradas las pussaivladads da sa cruschar, ed en l'avegnir po la punt vegnir sanada entant ch'il traffic circulescha vinavant. Durant la construcziun da la punt nova vegn il traffic manà sur ina punt auxiliara che vegn montada sur la Plessur in toc pli engiu.
-

Glisch verda per la protecziun cunter crudada da crappa a San Vittore
La regenza grischuna ha approvà il project "Protecziun cunter crudada da crappa Favera" da la vischnanca da San Vittore ed ha garantì ina contribuziun chantunala da maximalmain 115 920 francs.
Suenter duas crudadas da crappa èn vegnidas constatadas pliras zonas instabilas en il territori Favera. Perquai ha la vischnanca incumbensà l'uffizi da guaud e privels da la natira d'examinar e d'elavurar mesiras per reducir la situaziun da privel. Il project ch'è ussa avant maun prevesa d'installar raits cunter crudada da crappa d'ina lunghezza totala da 50 meters.
-
©Uffizi federal da topografia


Gremi: regenza
Funtauna: rg chanzlia chantunala dal Grischun
Neuer Artikel