Zum Seiteninhalt

La regenza ha deliberà la missiva tar la revisiun parziala da la lescha d'energia dal chantun Grischun

  • Erste Mitteilung
  • Neuen Beitrag einfügen
La regenza ha deliberà la missiva tar la revisiun parziala da la lescha d'energia dal chantun Grischun per mauns dal cussegl grond. "Promover empè da pretender", "adattar al stadi da la tecnica" e stgaffir ina "soluziun grischuna" èn las directivas da la revisiun parziala. Cun ina revisiun concisa da la lescha ha la regenza l'intenziun da reducir las emissiuns da CO2 en il sectur dals edifizis e d'augmentar l'effizienza energetica dals edifizis. Uschia vul ella gidar a realisar la strategia d'energia 2050 da la confederaziun e sustegnair la finamira da la politica dal clima dal cussegl federal da reducir las emissiuns a netto nulla.

Cun la revisiun parziala da la lescha d'energia duain las basas legalas en il sectur dals edifizis vegnir adattadas a las cundiziuns generalas midadas da la politica d'energia. Ella garantescha oravant tut che las prescripziuns vegnian adattadas al stadi da la tecnica.

Adattaziun al stadi da la tecnica
En il sectur dals edifizis po l'adattaziun al stadi da la tecnica vegnir cuntanschida tant tras mesiras tar la tecnica da chasa per reducir l'emissiun da CO2 sco er tras mesiras per augmentar l'effizienza energetica. Uschia vegn furnida ina contribuziun a la politica d'energia sco er ina contribuziun impurtanta a la politica dal clima per decarbonisar il sectur dals edifizis. Tar novs edifizis servan las valurs adattadas al stadi da la tecnica ultra da quai a l'agen interess da las proprietarias e dals proprietaris da chasas. Uschia han els la garanzia che lur edifizi po mantegnair sia valur economica ad ina vista pli lunga.

En il sectur dals edifizis fan ils edifizis d'abitar ora var dus terzs da las surfatschas che retiran energia e pon pervia da quai gidar en moda essenziala a cuntanscher la finamira dal cussegl federal da reducir las emissiuns a netto nulla en la bilantscha da CO2. Tar edifizis existents che vegnan duvrads per intents d'abitar tegna l'adattaziun al stadi da la tecnica en spezial quint dal fatg che las proprietarias ed ils proprietaris da chasas han differentas alternativas, sch'els ston remplazzar in stgaudament fossil. Sch'i sto vegnir remplazzà il stgaudament en edifizis existents ch'èn pli vegls e ch'èn il medem mument energeticamain disfavuraivels, duai quel pia vegnir equipà uschia che almain 10 pertschient dal basegn d'energia po vegnir respargnà u cuvrì cun energias regenerablas. Experientschas en auters chantuns cun finamiras cumparegliablas mussan che proprietarias e proprietaris da chasas sa decidan en in tal cas per gronda part per in sistem da stgaudament cun energias regenerablas ed integreschan en lur ponderaziun ils custs da manaschi dal stgaudament ch'èn pli favuraivels a lunga vista.

"Promover empè da pretender" cun ina soluziun grischuna

Ils princips "promover empè da pretender" sco er il stgaffir ina "soluziun grischuna" sa mussan il meglier en las disposiziuns per promover implants fotovoltaics per producir dapli electricitad durant l'enviern. La revisiun parziala da la lescha d'energia stgaffescha la basa per in program da promoziun che permetta da producir electricitad durant l'enviern vi d'edifizis e vi da stabiliments d'infrastructura e renunzia – en divergenza da las prescripziuns dals chantuns (MoPEC) – da prescriver in implant per producir atgna electricitad, sch'i vegnan construids novs edifizis. Uschia duain vegnir promovids sistematic quels implants fotovoltaics che produceschan en emprima lingia electricitad durant l'enviern e che gidan uschia a serrar la largia da provediment da l'enviern. Uschia poi vegnir fatg frunt a l'import d'electricitad, che consista per regla d'electricitad producida cun charvun u cun forza atomara e che ha per regla ina nauscha bilantscha da CO2.

Contribuziun dal chantun a la politica dal clima e d'energia da la confederaziun
La regenza è persvadida che questas mesiras èn necessarias per cuntanscher tant las finamiras chantunalas sco er internaziunalas da la politica dal clima e per pudair sustegnair la strategia d'energia 2050 da la confederaziun e la finamira da la politica dal clima dal cussegl federal, ch'è quella da reducir las emissiuns a netto nulla per l'onn 2050.

Il cussegl grond vegn a tractar il project probablamain en la sessiun da favrer 2020.


Agiunta:
missiva


Infurmaziuns:
cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch


Gremi: regenza
Funtauna: rg chanzlia chantunala dal Grischun
Neuer Artikel