Zum Seiteninhalt

Regulaziun dal triep dal Beverin – stadi actual

  • Erste Mitteilung
  • Neuen Beitrag einfügen
Ils 4 d'october 2019 ha il chantun disponì la regulaziun dal triep da lufs enturn il Beverin. Il cumenzament d'october èsi gartegià a la surveglianza da chatscha da sajettar dus lufs giuvens. L'emna passada ha pudì vegnir sajettà in terz animal giuven. In ulteriur animal giuven dal triep dal Beverin ha stuì vegnir sajettà da la surveglianza da chatscha oz en damaun, suenter ch'el era vegnì blessà grevamain en in accident da traffic.

Grazia al monitoring tras la surveglianza da chatscha da l'uffizi da chatscha e pestga dal Grischun ha il moviment dals lufs dal triep dal Beverin pudì vegnir persequità cuntinuadamain. L'auta mobilitad dals animals e la topografia difficila avevan impedì fin ussa ina intervenziun. Cun l'emprima naiv èn ils lufs sa rendids en regiuns pli bassas. Il terz luf, in giuven mastgel, è vegnì sajettà l'emna passada giu en la val en la vischinanza d'in abitadi.

Independentamain da las stentas da regulaziun da la surveglianza da chatscha è in ulteriur luf giuven vegnì tutgà oz en damaun sper Cazas d'in auto e blessà grevamain. La surveglianza da chatscha ha sin quai stuì sajettar il luf. Tranter la sajettada organisada da l'emna passada e l'accident da traffic dad oz n'exista nagin connex. L'animal disgrazià è medemamain in giuven mastgel dal triep dal Beverin. En enclegientscha cun l'uffizi federal d'ambient vegn il luf giuven disgrazià mess a quint al contingent per la regulaziun dal triep dal Beverin.

Ils animals vegnan ussa analisads en l'ospital d'animals da l'universitad da Berna ed identifitgads geneticamain en l'universitad da Losanna. Entant che l'execuziun da la regulaziun dal dumber da lufs dura, na vegnan communitgads nagins ulteriurs detagls davart il lieu e davart las uras da las acziuns.
   

Ulteriuras infurmaziuns en la communicaziun a las medias dals 4 d'october 2019


Infurmaziuns:
Hannes Jenny, vicemanader da l'uffizi da chatscha e pestga, tel. 081 257 38 92, e-mail Hannes.Jenny@ajf.gr.ch


Gremi: uffizi da chatscha e pestga
Funtauna: rg uffizi da chatscha e pestga
Neuer Artikel