Zum Seiteninhalt

Communicaziun da la regenza dals 28 da november 2019

  • Erste Mitteilung
  • Neuen Beitrag einfügen

La regenza ha terminà la concurrenza d'investurs per l'areal Cadonau sco er la procedura d'offerta per l'edifizi da chemia a la Planaterrastrasse 11 a Cuira. Ultra da quai ha ella concedì differentas contribuziuns chantunalas e surdà l'incumbensa per survegliar spezias da mustgins esters invasivs.

Terminà la concurrenza d'investurs per l'areal Cadonau a Cuira

La regenza ha terminà la concurrenza d'investurs per l'areal Cadonau a Cuira. L'areal tranter la Cadonau- e la Loëstrasse, directamain sut la clinica Waldhaus, vegn structurà da nov en il proxim futur. Per satisfar a las bleras pretensiuns ed als differents interess ha l'uffizi da construcziun auta laschà far ina concurrenza d'investurs. Igl è vegnì tschertgà in concept architectonic-urbanistic che mantegna ils conturns fermamain verds en l'areal e che pussibilitescha tant l'invista a sco er la vista da l'implant da la clinica. Sco part integrala dal studi è vegnida pretendida supplementarmain in'offerta per il tschains dal dretg da construcziun.

Suenter avair examinà las differentas soluziuns ha la regenza decidì da far il contract preliminar tar il dretg da construcziun cun il team d'investurs Asga Pensionskasse Genossenschaft (Son Gagl), Bollhalder Eberle Architektur (Son Gagl) e SIMA BREER Landschaftsarchitektur (Winterthur). Lur project proponì "Baumweissling" furma ina punt dal territori urban al territori rural. Cuntrari a la geometria severa dals edifizis da l'implant da la clinica mussa il project proponì ina surbajegiada cun cubus vivs cun blers chantuns ch'èn adattads al terren creschì ed integrads en la spunda. Il medem mument respecta il project proponì l'implant da la clinica e garantescha zonas intermediaras generusas. Cun ils spazis libers che cunfineschan cun il spazi da via e cun las numerusas vias da colliaziun stgaffescha il project blera publicitad ed interpretescha da nov il lieu existent.

-

©Bollhalder Eberle Architektur

Terminà la procedura d'offerta per l'edifizi da chemia a Cuira

La regenza ha approvà in contract da dretg da construcziun cun l'associaziun "bainviver-chur" per l'edifizi da chemia a la Planaterrastrasse 11 a Cuira. Il motiv è la midada da l'uffizi per la segirezza da victualias e per la sanadad d'animals (USVA) da la Planaterrastrasse 11 a l'edifizi nov dal center administrativ "sinergia" il matg 2020. Ils locals da labor ch'èn vegnids equipads tenor las pretensiuns specificas dal USVA na pon betg vegnir duvrads per autras activitads administrativas dal chantun senza intervenziun architectonica, uschia che l'edifizi duai vegnir surdà a terzas varts per ina nova utilisaziun. Per quest intent è vegnida publitgada ina procedura d'offerta.

Cun giuditgar las offertas en il rom da la procedura d'offerta ha il chantun valità – ultra da l'autezza dal tschains dal dretg da construcziun – supplementarmain la qualitad da las propostas d'utilisaziun areguard la soluziun urbanistica generala ed areguard l'idea concepziunala. Il concept d'utilisaziun preschentà da l'associaziun "bainviver-chur" mussa ina soluziun enritgenta per il quartier a l'ur da la citad veglia cun differentas caracteristicas da qualitad concernent l'engaschament social, il mix d'utilisaziun planisà, la durabilitad e la concepziun dals spazis libers. I vegn fatg quint ch'il project vegnia approvà e chattia sustegn tant en la publicitad sco er tar l'autoritad da la citad.

Surdà l'incumbensa per survegliar spezias da mustgins esters invasivs

La regenza ha concludì da cuntinuar cun il monitoring da spezias da mustgins esters invasivs, ch'è vegnì introducì l'onn 2016 en il Grischun, per ils onns 2019 fin 2021 en la dimensiun vertenta cun in'opziun da cuntinuaziun per ils onns 2022 fin 2024. Per quai ha ella incumbensà la firma gregeco scrl e la scuola universitaria professionale della Svizzera italiana (SUPSI) cun la realisaziun e cun l'evaluaziun. Ils custs per il monitoring importan annualmain 160 000 francs.

Dapi l'onn 2016 fa l'uffizi per la natira e l'ambient (UNA) – en collavuraziun cun tschertas vischnancas – in monitoring davart ils mustgins asiatics. Tant tar il mustgin-tigher (Mesauc, Bregaglia, Brusio, Viamala, Cuira) sco er tar il mustgin da chaglia asiatic (tut il territori da monitoring) ha stuì vegnir registrà onn per onn in augment respectivamain in'extensiun. Ultra da quai è vegnì scuvert il mustgin corean en Bregaglia ed en la vischnanca da Brusio. En vista a quest svilup ed en cunvegnientscha cun il center da cumpetenza per mustgins asiatics da la SUPSI èsi vegnì giuditgà sco necessari da cuntinuar cun il monitoring en il senn da la prevenziun.

-
©grececo ScRL Collavuraturs da la SUPSI e da la vischnanca da Bregaglia controllan l'aua stagnanta en in tumbin, sch'ella cuntegna larvas da mustgins  

Ediziun da la versiun taliana dal med d'instrucziun "Matematica 1 + 2 top"

La translaziun e la publicaziun da las duas broschuras "Matematica 1, carnet da lavur top" e "Matematica 2, carnet da lavur top" en talian è vegnida approvada da la regenza. Ils custs importan 35 000 francs. Per sustegnair ils giuvenils en il Grischun talian che vulessan metter lur accent sin temas matematics en il rom da la "nova structura da temp per l'individualisaziun" duain vegnir messas a disposiziun materialias da lavur supplementaras. Ils carnets da lavur "Matematica top 1+2" èn vegnids concepids da la chasa editura per meds d'instrucziun da Turitg sco cumplettaziun dal med d'instrucziun "Matematica stgalim secundar I" ch'è obligatoric en il Grischun. Quests carnets porschan a scolaras e scolars motivads lezias e pensums supplementars pretensius che pon vegnir elavurads e schliads en moda autonoma ed en atgna responsabladad.

Emprest e contribuziuns chantunalas per engrondir la halla da sport Färbi a Tavau

La regenza ha concedì a la fundaziun per il gimnasi da sport da Tavau ina contribuziun chantunala da maximalmain 1,5 milliuns francs per engrondir la halla da sport Färbi a Tavau. Questa contribuziun consista da 500 000 francs sut il titel "infrastructuras relevantas per il sistem" sco er d'in milliun francs en il senn dal concept per implants da sport d'impurtanza naziunala resp. chantunala (CISIN/CISIC). Supplementarmain ha la regenza deliberà ina contribuziun chantunala da var 348 000 francs sco prestaziun equivalenta a l'emprest federal (1,5 milliuns francs) en il rom da la nova politica regiunala (NPR).

L'investiziun planisada da la fundaziun per il gimnasi da sport da Tavau cumpiglia l'engrondiment e la renovaziun generala da la halla multifuncziunala existenta. Ella è ina infrastructura centrala per il sport d'elita (basa da trenament da Swiss-Ski), per la promoziun dal sport da talents giuvens (gimnasi da sport Tavau) e per il sport da massa da persunas indigenas e da giasts. Grazia a l'engrondiment ed a la renovaziun generala survegnan sportistas e sportists d'elita, en spezial da disciplinas da sport da naiv, ina infrastructura d'atletica autamain spezialisada e topmoderna che po vegnir duvrada er da sportistas e sportists da temp liber. Uschia vegn sviluppà vinavant e rinforzà er il center naziunal da trenament nordic e ski alpin.

-

©Fundaziun gimnasi da sport Tavau

Sustegn finanzial per la renovaziun da la chamona CAS Grialetsch a Zernez

Sut il titel "Finanziaziun speziala sport" ha la regenza concedì a l'uniun CAS secziun Tavau ina contribuziun chantunala da maximalmain 100 000 francs per renovar la chamona CAS Grialetsch a Zernez. Supplementarmain ha ella deliberà ina contribuziun chantunala da var 139 304 francs sco prestaziun equivalenta a l'emprest federal (600 000 francs) en il rom da la nova politica regiunala (NPR). Cun la renovaziun da la chamona Grialetsch duai vegnir cuntanschida ina gestiun moderna dals giasts che pernotteschan e dals giasts dal di. Il dumber da plazzas da durmir (var 60) na vegn betg augmentà. La finamira da la renovaziun architectonica è quella da metter a disposiziun als giasts in alloschi da muntogna attractiv che attira vinavant er giasts dal di durant la stad.

-

©Club alpin svizzer CAS, secziun Tavau

Emprest e contribuziun chantunala per engrondir ils locals culturals en l'hotel Laudinella

Per engrondir ils locals culturals en l'hotel Laudinella a San Murezzan ha la regenza concedì a la Laudinella SA ina contribuziun chantunala da var 143 100 francs sco prestaziun equivalenta a l'emprest federal (850 000 francs) en il rom da la nova politica regiunala (NPR). Il project cumpiglia la renovaziun cumplessiva da la sala da concert sco er dals locals existents en l'uschenumnà "tract da metropol" e la construcziun da trais salas novas per occurrenzas da grondezza mesauna. Quests locals culturals duain vegnir utilisads tant dals giasts da l'hotel sco er da persunas indigenas.

-

©Laudinella SA, San Murezzan

Novas directivas per duvrar vias chantunalas da colliaziun

Suenter che differentas vias chantunalas èn vegnidas renovadas, vegn fixà da nov il pais maximal admess ed abolì in scumond per camiuns cun chars annexs. Sin ils suandants trajects vegn il pais maximal auzà a 32 tonnas: via d'Umbrail, colliaziun Sta. Maria Val Müstair fin Runc Süsom; via d'Überlandquart, colliaziun vitg da Grüsch fin colliaziun N28 Grüsch center; via d'Überlandquart, Pendlasand fin Valzalum; via da Valzeina, Sand fin Boden; via da Pusserein, colliaziun Underpusserein fin colliaziun Büheli; via da St. Antönien, Chrüz fin colliaziun Sand e via da Rüti, colliaziun Büel fin colliaziun Stapfa.

Cun 40 tonnas dastgi vegnir charrà sin ils suandants trajects: via d'Überlandquart, colliaziun N28 Grüsch center fin Pendlasand; via da Valzeina, Au fin Sand e via da Segnas, colliaziun Segnas fin Pignola. Sin il traject numnà sco ultim vegn ultra da quai abolì il scumond per camiuns cun chars annexs.
Ultra da quai èn vegnidas giuditgadas da nov duas ulteriuras vias chantunalas, senza ch'ellas sajan vegnidas renovadas. Uschia dastgi vegnir charrà sin la via da Lon da nov cun in pais maximal da 32 tonnas e sin la via da la Muntogna da Schons da nov cun ina ladezza maximala fin 2,55 meters.



Gremi: regenza
Funtauna: rg chanzlia chantunala dal Grischun
Neuer Artikel