Navigaziun principala

Cuntegn da la pagina

Collisiuns mortalas da dus lufs en Surselva

  • Erste Mitteilung
  • Neuen Beitrag einfügen

La notg dals 26 da december als 27 da december hai dà duas collisiuns cun lufs en Surselva. Sin il territori da la vischnanca da Breil n'ha ina luffa giuvna betg survivì la collisiun cun in tren. Tranter Trin e Tumein è in'ulteriura luffa vegnida tschiffada e mazzada d'in auto. 

La luffa giuvna ch'è naschida quest onn e ch'è vegnida sut in tren enturn las 23.00 sin il territori da la vischnanca da Breil, appartegneva probablamain al triep da Valgronda. Quest triep viva en la regiun tranter Glion, la Val Sumvitg e la Val Lumnezia ed ha survegnì quest onn per l'emprima giada pitschens.

La segunda luffa, ch'è vegnida la medema notg sut in auto, è probablamain ina femella da l'onn passà dal triep dal Calanda. La collisiun è vegnida annunziada immediatamain. Perquai ch'ins ha chattà al lieu da l'accident mo in pèr pelegns, ha la surveglianza da chatscha stuì tschertgar la luffa cun il chaun. L'animal è vegnì chattà mort. Per ina identificaziun exacta vegnan ussa tuttas duas luffas surdadas al center per medischina da peschs e selvaschina da l'universitad da Berna.

Cumportament midà durant l'enviern

Pervia da la naiv en las regiuns pli autas ston ins quintar per il mument ch'ils lufs giajan pli savens a tschertgar pavel giu la val ed en la vischinanza dals abitadis. Observaziuns da tal gener duain mintgamai vegnir annunziadas al guardiaselvaschina responsabel.


Infurmaziuns:

dr. Adrian Arquint, manader da l'uffizi da chatscha e pestga dal Grischun, tel. 081 257 38 92, e-mail Adrian.Arquint@ajf.gr.ch


Gremi: uffizi da chatscha e pestga
Funtauna: rg uffizi da chatscha e pestga

Neuer Artikel