Navigation

Inhaltsbereich

  • Erste Mitteilung
  • Neuen Beitrag einfügen

La regenza grischuna ha nominà Urban Maissen sco nov manader da l'uffizi da guaud e privels da la natira. El vegn a surpigliar questa funcziun il 1. da fanadur 2020.

La regenza grischuna ha elegì Urban Maissen sco nov manader da l'uffizi da guaud e privels da la natira. L'inschigner forestal diplomà SPF ha 54 onns e daventa successur da Reto Hefti, che va en pensiun suenter in'activitad da blers onns sco manader da l'uffizi.

Suenter sia scolaziun dad inschigner forestal diplomà SPF e suenter in'activitad da dus onns en l'economia privata ha Urban Maissen cumenzà l'onn 1992 ina plazza tar l'inspecturat forestal dal Grischun da quella giada, ch'è oz l'uffizi da guaud e privels da la natira. Suenter esser stà durant plirs onns inschigner forestal regiunal è el daventà l'onn 2006 manader regiunal da la regiun Surselva, e dapi l'onn 2012 è el er substitut dal manader da l'uffizi. Urban Maissen abita cun sia famiglia a Glion.

L'uffizi da guaud e privels da la natira furnescha vasts servetschs per il multitalent "guaud". L'uffizi coordinescha la construcziun d'ovras da protecziun cunter privels da la natira e d'infrastructuras adattadas per la cultivaziun dal guaud, sustegna las proprietarias ed ils proprietaris da guaud e gida – cun la planisaziun dal svilup dal guaud sco er cun la determinaziun da zonas da privel – a coordinar ils differents interess per il guaud. En quest connex ha Urban Maissen l'incumbensa da manar circa 80 collavuraturas e collavuraturs en la centrala a Cuira sco er en ils centers da cumpetenza regiunals.

Fotografia agiuntada:

-

Urban Maissen, nov manader da l'uffizi da guaud e privels da la natira 


Infurmaziuns:

cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch


Gremi: regenza
Funtauna: rg chanzlia chantunala

Neuer Artikel