Navigation

Inhaltsbereich

  • Erste Mitteilung
  • Neuen Beitrag einfügen
A partir dal cumenzament da favrer 2020 vegnan introducids en etappas en il chantun Grischun ils novs documents da legitimaziun da persunas estras en il format da carta da credit. A partir da la stad 2021 vegnan emess mo pli ils novs documents da legitimaziun.

A partir dal favrer 2020 vegnan emessas en il chantun Grischun las permissiuns da domicil (document da legitimaziun C) en il nov format da carta da credit. Fin il pli tard la stad 2021 vegn er midà il format da tut las autras categorias da permissiun. Per l'emissiun dals novs documents da legitimaziun ston las petentas ed ils petents dals stadis da la UE/AECL laschar registrar digitalmain lur fotografia e lur suttascripziun en in dals dus Centers da documents d'identitad dal chantun Grischun a Cuira u a Zernez. Questa fotografia e la suttascripziun valan tschintg onns.

Tut ils documents da legitimaziun da persunas estras ch'èn vegnids emess fin ussa, restan valaivels fin a lur scadenza. In nov document da legitimaziun vegn emess en il rom da l'emprima concessiun, en il rom da la prolungaziun dal document sco er en il cas d'ina midada relevanta u d'ina perdita dal document.

Inoltrar vinavant las dumondas a la vischnanca

Las dumondas vegnan inoltradas vinavant sur la Controlla d'abitants da las vischnancas. Ma da nov na sto betg pli vegnir agiuntada a la dumonda ina fotografia da passaport. Las petentas ed ils petents survegnan ina invitaziun da l'Uffizi da migraziun e da dretg civil da fixar in termin cun in dals Centers da documents d'identitad, uschespert che la permissiun dumandada po vegnir concedida. Avant che survegnir questa invitaziun na pon la fotografia e la suttascripziun anc betg vegnir registradas. Ils documents da legitimaziun vegnan tramess a las petentas ed als petents sco fin ussa dal producent sur la vischnanca.

Las taxas da permissiun per las burgaisas ed ils burgais da la UE/AECL restan da princip ils 65 francs vertents per document. Vitiers vegnan 5 francs per las taxas da spediziun. Per las permissiuns da domicil vegnan pretendids supplementarmain 15 francs per endatar la fotografia e la suttascripziun sco er 10 francs per emetter il document en il format da carta da credit.

Ulteriuras infurmaziuns vegnan mussadas sin la pagina d'internet da la Confederaziun:
https://www.sem.admin.ch/sem/de/home/aktuell/gesetzgebung/vzae-gebv-aug.html


Infurmaziuns:
Markus Haltiner, substitut dal manader da l'Uffizi da migraziun e da dretg civil, tel. 081 257 25 22, e-mail Markus.Haltiner@afm.gr.ch


Gremi: Uffizi da migraziun e da dretg civil
Funtauna: rg Uffizi da migraziun e da dretg civil
Neuer Artikel