Navigaziun principala

Cuntegn da la pagina

La Cumissiun per ambient, traffic ed energia ha predeliberà la revisiun parziala da la Lescha d'energia dal chantun Grischun

  • Erste Mitteilung
  • Neuen Beitrag einfügen
La Cumissiun dal Cussegl grond per ambient, traffic ed energia (CATE) ha tractà la missiva da la Regenza tar la revisiun parziala da la Lescha d'energia dal chantun Grischun (LEG). Cun diesch cunter ina vusch è ella entrada en il project e propona duas cumplettaziuns essenzialas dal sboz da missiva al Cussegl grond.

La CATE è s'occupada intensivamain da la revisiun parziala da la LEG. A las tut en tut trais sesidas sut il presidi dal deputà Emil Müller èn er sa participads il cusseglier guvernativ Mario Cavigelli, schef dal Departament da construcziun, traffic e selvicultura, e represchentantas e represchentants da l'administraziun. La finamira dal project è quella da tractar l'element central da la discussiun dal clima, numnadamain da reducir il consum da carburants e da combustibels fossils e pia la svapur da CO2 cun duvrar energias regenerablas e cun prender mesiras per reducir il basegn d'energia. Per quest intent duai la revisiun parziala da la LEG adattar las basas legalas pertutgant il sectur d'edifizis a las cundiziuns generalas midadas da la politica d'energia.

Producziun d'atgna electricitad per edifizis novs e deducziun fiscala
La Cumissiun sustegna il sboz da lescha che vegn preschentà da la Regenza. El duai render moderadamain pli severas las prescripziuns da construcziun per edifizis novs e cuntanscher en il futur il diever d'energias regenerablas u da mesiras per l'effizienza energetica, cur ch'i vegnan remplazzads producents da chalur en edifizis existents. La Cumissiun ha ultra da quai fatg unanimamain duas propostas cumplementaras pli detagliadas per mauns dal Cussegl grond. Per l'ina è quai l'obligaziun da producir atgna electricitad per edifizis novs, sco che la Regenza aveva er gia proponì en il sboz da consultaziun. Quai vul dir ch'edifizis novs ston producir sezs ina part da lur electricitad necessaria. Excepziuns èn previsas per edifizis situads en lieus cun pauca radiaziun dal sulegl u per edifizis da Minergie. Per l'autra duai vegnir introducida ina deducziun fiscala per investiziuns che servan a spargnar energia u a proteger l'ambient. Uschia recumonda la Cumissiun al parlament da far ina regulaziun, sco ch'ella è gia introducida tar la Confederaziun ed en blers auters chantuns.

Numerusas propostas da minoritad
Ina minoritad da la Cumissiun fa ultra da quai anc pliras propostas che surpassan en lur effect il sboz da lescha: Tranter auter duain las vischnancas vegnir obligadas da far in concept d'energia, da remplazzar fin la fin da l'onn 2035 ils stgaudaments electrics da resistenza ed ils indrizs da stgaudar l'aua electrics centrals sco er da spargnar 20 empè da 10 pertschient dal basegn d'energia decisiv, cur ch'i vegnan remplazzads producents da chalur. Plinavant propona la minoritad da la Cumissiun d'introducir fin l'onn 2030 contribuziuns a favur da sistems per chargiar vehichels electrics ed in obligatori da furnir cumprovas d'energia per edifizis.

Il Cussegl grond vegn a tractar la fatschenta durant la sessiun da favrer 2020.


Infurmaziuns:

President da la Cumissiun Emil Müller, tel. 078 740 29 33


Gremi: Cumissiun per ambient, traffic ed energia
Funtauna: rg Cumissiun per ambient, traffic ed energia
Neuer Artikel