Navigation

Inhaltsbereich

  • Erste Mitteilung
  • Neuen Beitrag einfügen

La Regenza grischuna nominescha Gian Reto Caduff sco nov manader da l'Uffizi per industria, mastergn e lavur (UCIML). El vegn a surpigliar questa funcziun il 1. da settember 2020.

Avant 11 onns è lic. iur. Gian Reto Caduff entrà en servetsch sco collavuratur giuridic tar l'Uffizi per industria, mastergn e lavur. Dapi l'onn 2018 maina el la partiziun da las fatschentas administrativas ed è il substitut dal manader da l'uffizi. Gian Reto Caduff suonda Paul Schwendener che va en la meritada pensiun suenter in'activitad da blers onns sco manader da l'Uffizi per industria, mastergn e lavur.

Gian Reto Caduff che ha 43 onns, è creschì si a Pasqual, ha frequentà la scola chantunala a Cuira ed ha absolvì il studi da giurisprudenza a l'universitad da Turitg. Suenter avair fatg intgins praticums tar l'anteriura Dretgira districtuala Plessur e tar la Dretgira administrativa dal Grischun ha el lavurà 2 onns sco substitut e sco collavuratur giuridic en in biro d'advocatura en Engiadina. Silsuenter ha el acquistà la patenta d'advocat dal Grischun.

L'Uffizi per industria, mastergn e lavur è responsabel per exequir l'assicuranza cunter la dischoccupaziun (intermediaziun da lavur, mesiras per il martgà da lavur e cassa da dischoccupaziun), las differentas leschas concernent las cundiziuns da lavur (procedura d'annunzia/da permissiun concernent forzas da lavur estras, lavur illegala, intermediaziun ed emprest da persunal) sco er las disposiziuns legalas davart la protecziun da las lavurantas e dals lavurants e davart la prevenziun d'accidents. En quest connex ha Gian Reto Caduff l'incumbensa da manar circa 145 collavuraturas e collavuraturs en la nova centrala "Sinergia" a Cuira sco er en ils Centers regiunals per intermediaziun da lavur.

Fotografia agiuntada:

-
Gian Reto Caduff, nov manader da l'Uffizi per industria, mastergn e lavur 


Infurmaziuns:
cusseglier guvernativ Marcus Caduff, schef dal Departament d'economia publica e fatgs socials, tel. 081 257 23 01, e-mail Marcus.Caduff@dvs.gr.ch


Gremi: Regenza
Funtauna: rg Departament d'economia publica e fatgs socials
Neuer Artikel