Cuntegn da la pagina

Il president da la Regenza visita tut las indesch regiuns dal chantun Grischun

  • Erste Mitteilung
  • Neuen Beitrag einfügen

En sia funcziun sco president da la Regenza e sco schef dal Departament da finanzas e vischnancas visita Christian Rathgeb las Conferenzas da las presidentas e dals presidents da tut las indesch regiuns. En il center da las visitas stattan ils contacts persunals cun las presidentas communalas e cun ils presidents communals. Ultra da quai servan ils inscunters al barat vicendaivel davart la collavuraziun tranter las vischnancas ed il chantun. Sin sias visitas vegn Christian Rathgeb accumpagnà da Thomas Kollegger, manader da l'Uffizi da vischnancas.

Dapi l'onn 2019 maina il president da la Regenza Christian Rathgeb il Departament da finanzas e vischnancas (DFV). El lavura pia stretgamain vid e cun la basa da nossa structura dal stadi federalistica, las vischnancas. Las pitgas principalas da la gulivaziun da finanzas – structura communala, repartiziun da las incumbensas e gulivaziun da finanzas en il senn pli stretg – èn vegnidas adattadas als basegns actuals durant ils ultims onns. Tut ils projects da quests secturs han en total la finamira da rinforzar las vischnancas ed il sistem federalistic. Valair vali da tegnair quint consequentamain dal princip da subsidiaritad. En il sectur da las structuras territorialas ha la refurma dal territori pudì vegnir terminada cun success. Vid la refurma da vischnancas cuntinuescha il chantun a lavurar cun cleras finamiras.

Barat a favur d'ina relaziun colleghiala tranter il chantun e las vischnancas

Mintga dus onns ha lieu la dieta da vischnancas da l'Uffizi da vischnancas. Quai permetta mintgamai il chantun d'infurmar davart temas ch'occupan actualmain u che vegnan anc ad occupar las vischnancas da noss chantun. Durant ils onns tranteren duai in barat formal accentuar la relaziun colleghiala tranter las vischnancas ed il chantun. Igl è il giavisch dal president da la Regenza Christian Rathgeb da discutar al lieu davart quests temas e d'avair chapientscha per las dumondas da las vischnancas. En il decurs da ses onn presidial vegn el perquai a visitar tut las regiuns.

Il punct cuminaivel da tut sias visitas è il barat d'infurmaziuns e d'experientschas en il rom d'ina Conferenza da las presidentas e dals presidents. A las Conferenzas da las presidentas e dals presidents vegn il president da la Regenza Christian Rathgeb a pudair infurmar principalmain davart l'emprim Rapport davart l'efficacitad tar la gulivaziun da finanzas. En il rom da quest rapport s'occupa la Regenza intensivamain dals instruments da la gulivaziun da finanzas e da las basas da datas e vegn a proponer las adattaziuns necessarias. Il barat direct cun las presidentas communalas ed ils presidents communals permetta plinavant da vegnir a savair ils quitads e las miserias da las vischnancas. Il president da la Regenza vegn accumpagnà da Thomas Kollegger, manader da l'Uffizi da vischnancas.

Program da las visitas en las regiuns
Las visitas en las regiuns han lieu a las suandantas datas:

regiun Landquart 17-02-2020
regiun Surselva 21-02-2020
regiun Alvra 20-03-2020
regiun Plaun 15-04-2020
regiun Moesa 16-04-2020
regiun Bernina 23-04-2020
regiun Malögia 23-04-2020
regiun Engiadina bassa/Val Müstair 07-05-2020
regiun Plessur 11-05-2020
regiun Viamala 13-05-2020
regiun Partenz/Tavau 08-06-2020



Infurmaziuns:

president da la Regenza dr. Christian Rathgeb, schef dal Departament da finanzas e vischnancas, tel. 081 257 32 01, e-mail: Christian.Rathgeb@dfg.gr.ch


Gremi: Departament da finanzas e vischnancas
Funtauna: rg Departament da finanzas e vischnancas

Neuer Artikel