Navigaziun principala

Cuntegn da la pagina

L'Uffizi per la furmaziun media-superiura survegn ina nova direcziun

  • Erste Mitteilung
  • Neuen Beitrag einfügen

La Regenza grischuna ha nominà signur dr. Gion Lechmann sco nov manader da l'Uffizi per la furmaziun media-superiura (UMS). El vegn a surpigliar questa funcziun il 1. d'avust 2020.

Il futur manader da l'uffizi che ha 51 onns è dapi l'onn 2006 rectur da la Scola chantunala grischuna e substitut dal manader dal UMS per il sectur da las scolas medias. Per l'avust daventa el successur da dr. Hans Peter Märchy, che vegn ad ir en pensiun suenter avair manà il UMS durant 15 onns cun success.

Suenter avair terminà il Seminari da magisters e suenter l'acquist dal diplom da magister secundar ed il diplom per l'instrucziun superiura ha Gion Lechmann promovì a l'Universitad da Friburg cun ina dissertaziun davart il moviment linguistic rumantsch. En numerusas furmaziuns supplementaras è el s'acquistà tranter auter mussaments da prestaziun en la direcziun d'organisaziuns da non-profit ed en l'administraziun publica. Sper e suenter ses studis ha el rimnà experientscha pratica sco magister sin tut ils stgalims da furmaziun grischuns, avant ch'el è entrà en la Scola chantunala grischuna, l'emprim sco manader da projects ed a partir da l'onn 2004 sco conrectur. 

Gia suenter 2 onns è Gion Lechmann vegnì elegì sco rectur da la Scola chantunala grischuna. En questa funcziun ha el contribuì en moda essenziala cun numerusas iniziativas e projects a l'ulteriur svilup da la Scola chantunala. Grazia a sias enconuschientschas cumplessivas ed a sias experientschas, a sias grondas abilitads concepziunalas ed analiticas ed a sia persunalitad che s'orientescha a la chaussa è el vegnì tschernì en numerus gremis spezials chantunals e naziunals. 

Sco rectur e sco commember da la direcziun dal UMS ha Gion Lechmann cumprovà sias cumpetenzas professiunalas e directivas. Menziunads spezialmain ston vegnir ses vasts contacts en ils fatgs da furmaziun chantunals e naziunals e sia chapientscha speziala per ils giavischs dal sectur da furmaziun grischun che han da far cun la plurilinguitad.

L'Uffizi per la furmaziun media-superiura è il post da contact tranter l'administraziun chantunala e las instituziuns da furmaziun dal sectur da furmaziun terziar, differentas instituziuns da perscrutaziun domiciliadas en il chantun sco er las scolas a temp cumplain dal stgalim secundar II. L'uffizi garantescha che las instituziuns da furmaziun observian las prescripziuns legalas e realisescha la procedura chantunala d'admissiun a las scolas medias. El è responsabel per calcular las contribuziuns a las instituziuns da furmaziun e da perscrutaziun. Ultra da quai maina el la Scola chantunala ch'è suttamessa directamain ad el ed il sectur d'abitar e d'alimentaziun da tala.

Fotografia agiuntada:

-
signur dr. Gion Lechmann, nov manader da l'Uffizi per la furmaziun media-superiura

Infurmaziuns:
cusseglier guvernativ Jon Domenic Parolini, schef dal Departament d'educaziun, cultura e protecziun da l'ambient, tel. 081 257 27 12, e-mail Jondomenic.Parolini@ekud.gr.ch


 

Neuer Artikel