Per las Ovras electricas Mesauc SA (OEM), per l'Elettricità Industriale SA (ELIN) e per la Tecnicama SA (TEC) ha la Regenza ordinà la sanaziun da las auas restantas ch'è prescritta da la lescha. Tras las disposiziuns da sanaziun vegnan las gestiunarias da las ovras electricas obligadas tranter auter da construir in uschenumnà indriz da dotaziun en la Calancasca tar la tschiffada d'aua Valbella e da restituir quantitads d'aua da dotaziun. Fin a la fin da la concessiun da las OEM n'approvescha la Regenza plinavant naginas novas utilisaziuns da la forza idraulica che sa chattan en la Calancasca sur la tschiffada d'aua da l'implant electric Sassello (auals principals e laterals) sco er en la Moesa sur la sbuccada da la Calancasca (auals principals e laterals). Quai dentant senza restrenscher autras utilisaziuns, sco per exempel la producziun d'aua da baiver e d'aua minerala, ennavadas e sauaziuns. Exceptads da quai èn dus implants electrics pitschens che sa chattan en ina procedura d'approvaziun currenta sco er dus ulteriurs projects d'implants electrics pitschens, uschenavant che las concessiuns per quests dus projects vegnan inoltradas fin la fin da zercladur 2021 al chantun Grischun per l'approvaziun. Questa disposiziun permetta da far in ulteriur pass impurtant en connex cun las sanaziuns da las auas restantas en il Grischun. Per 203 da totalmain 231 tschiffadas d'aua en il chantun è la sanaziun da las auas restantas ussa pia reglada. Tut en tut derivan var 92 pertschient da la producziun totala en il chantun dals implants electrics ch'eran da sanar, ma ch'èn gia reglads.

Ensemen cun la sanaziun da las auas restantas è vegnida ordinada in'obligaziun da sanar l'ascensiun e la descensiun dals peschs tar la tschiffada d'aua Valbella. Las OEM ston instradar la planisaziun da las mesiras necessarias.

La Regenza ha approvà il project "Sistem da preavertiment Brattas / God Ruinas" da la vischnanca da San Murezzan ed ha garantì ina contribuziun chantunala da maximalmain 312 000 francs per realisar il project. Il sistem da preavertiment vegn endrizzà per augmentar la protecziun dal territori d'abitadi da San Murezzan e per proteger valurs materialas considerablas cunter eveniments da la natira. Cun survegliar sistematicamain las spundas sbuvantas cun agid dal sistem da preavertiment duai esser pussaivel da percepir baud avunda in'acceleraziun dal moviment da massa e d'instradar ad uras mesiras correspundentas.

Il territori d'abitadi da San Murezzan è situà per gronda part sin ina sbuvada gronda che sa cumpona da las sbuvadas parzialas Brattas e God Ruinas. Dapi ils onns 1970 èn vegnidas fatgas retschertgas geologicas, geotecnicas ed idrogeologicas. Ultra da quai vegnan ils moviments da las sbuvadas survegliads cun mesiraziuns supplementaras: la sbuvada da Brattas dapi l'onn 1988 e la sbuvada dal God Ruinas dapi l'onn 2010. Differents eveniments, sco per exempel fermas precipitaziuns, pon chaschunar in'acceleraziun dals moviments da las sbuvadas.

©Uffizi federal da topografia

La Regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel la dumengia, ils 17 da matg 2020:

- Iniziativa dal pievel dals 31 d'avust 2018 "Per ina immigraziun moderada (Iniziativa da limitaziun)";

- midada dals 27 dasettember 2019 da la Lescha federala davart la chatscha e la protecziun dals mamifers e dals utschels selvadis (Lescha da chatscha, LChP); e

- midada dals 27 dasettember 2019 da la Lescha federala davart la taglia federala directa (LTFD) (resguard fiscal dals custs per la tgira d'uffants tras terzas persunas).