Navigation

Inhaltsbereich

  • Erste Mitteilung
  • Neuen Beitrag einfügen
Il chantun Grischun e la citad da Cuira han precisà lur regulaziuns concernent scumonds d'occurrenzas. La raschun èn las novas disposiziuns ch'èn vegnidas concludidas dal schef dal Departament federal da l'intern e da la suprastanza da la Conferenza svizra da las directuras e dals directurs chantunals da sanadad. Il cunfin per occurrenzas criticas è da nov tar 150 persunas e vegn graduà supplementarmain. Actualmain èn 11 persunas en il chantun infectadas cun il coronavirus. Ultra dals uffizis chantunals èn en acziun er il Stab directiv chantunal e la Protecziun civila. Els sustegnan ils servetschs ordinaris. A partir da glindesdi vegn plinavant endrizzada ina nova plattafurma da communicaziun.

Situaziun actuala: Indesch persunas malsaunas

Actualmain èsi confermà che indesch persunas en il chantun Grischun èn infectadas cun il coronavirus. Questas persunas èn uffants, dunnas ed umens che sa trategnan en Engiadin'Ota. Ellas èn vegnidas ospitalisadas sin basa da las prescripziuns da l'Uffizi federal da sanadad publica (UFSP) d'isolar persunas pertutgadas. Tut en tut èn vegnidas testadas fin ussa 210 persunas, 8 resultats n'èn betg anc avant maun. (Stadi: oz en damaun).

Regulaziuns coordinadas per occurrenzas
En l'entira Svizra han ins fin ussa identifitgà e mess en quarantina persunas che avevan contact cun persunas infectadas. Pervia dals dumbers creschents daventan l'identificaziun e la persecuziun pli difficilas. La strategia vegn ussa midada en quel senn d'evitar anc pli fitg fullas da glieud pli grondas e stretgs contacts. Il schef dal Departament federal da l'intern e la suprastanza da la Conferenza svizra da las directuras e dals directurs chantunals da sanadad han perquai precisà ier saira las regulaziuns concernent scumonds d'occurrenzas. Quai cun la finamira d'unifitgar questas regulaziuns.

Consequenzas per il Grischun: Il chantun adattescha sia pratica areguard occurrenzas e rinforza la protecziun da gruppas da ristga

Il chantun Grischun adattescha perquai sia pratica areguard occurrenzas al nov sistem.
  • Vinavant scumandadas èn occurrenzas cun passa 1000 persunas.
  • Da princip permessas èn occurrenzas cun main che 1000 participantas e participants
    • en locals serrads cun maximalmain 150 persunas che circuleschan libramain;
    • en locals serrads, sch'i stat a disposiziun a mintga persuna preschenta da tut temp ina surfatscha da sa trategnair da pli che 4 meters quadrat;
    • en locals serrads mobigliads cun sutgas, sche betg pli che 300 persunas n'èn preschentas il medem mument;
    • al liber, sche betg pli che 500 persunas n'èn preschentas il medem mument a questas occurrenzas.
  • Per tut las ulteriuras occurrenzas dovri er vinavant ina consideraziun da las ristgas ensemen cun il chantun.
Las mesiras generalas d'igiena e da contact ston vegnir observadas tar tut las occurrenzas.

Il post da contact per dumondas d'occurrenza examinescha actualmain tut las dumondas ch'èn gia entradas per il temp a partir dals 6 da mars 2020, sch'ellas pon vegnir permessas tenor las novas cundiziuns. Ils organisaturs vegnan infurmads immediatamain, sch'il giudicament è sa midà.

A la conferenza da medias dad oz han l'Uffizi da sanadad e la media chantunala ultra da quai rendì attent al fatg ch'i sa tractia ussa pli fitg da proteger gruppas da ristga. Latiers tutgan:
  • persunas sur 65 onns
  • persunas che han cunzunt las suandantas malsognas:
    • pressiun dal sang auta
    • diabetes
    • malsognas dal cor e da la circulaziun
    • malsognas cronicas da la via respiratorica
    • cancer
    • malsognas e terapias che flaivlentan il sistem d’immunitad
Plinavant ha l'Uffizi da sanadad punctuà che las autoritads dovrian il sustegn da la populaziun. En spezial a la plazza da lavur ston vegnir protegidas las persunas che appartegnan a gruppas da ristga.

Pratica en il chantun: il stab directiv sustegna l'Uffizi da sanadad
En il chantun Grischun ha l'Uffizi da sanadad anc adina la direcziun en chaussa. El vegn sustegnì da parts dal stab directiv chantunal. Quel stat en stretg contact ed en in barat regular cun la Confederaziun, cun l'armada, cun ils chantuns cunfinants e cun las vischnancas.

Actualmain sa preparan ultra da quai ils uffizis per tegnair en funcziun lur manaschi er, sche collavuraturas e collavuraturs mancan. Appartegnents da la Protecziun civila sustegnan l'Ospital chantunal dal Grischun e sa preparan per pudair gidar l'Ospital da l'Engiadin'Ota. Els organiseschan ultra da quai la repartiziun da las mascras da protecziun e d'ulteriur material. Examinà vegn actualmain da metter en funcziun parts dals stabiliments dal servetsch sanitar. En cas da basegn duain quels distgargiar ils ospitals.

Las scolas restan avertas sco normal

Ils represchentants dal chantun han punctuà che las scolas restan avertas sco normal. Cun quai vul il chantun impedir tranter auter che nonas e nons resp. tattas e tats sco eventuals appartegnents d'ina gruppa da ristga stoppian guardar dals uffants.

La nova plattafurma da communicaziun è activa dapi il glindesdi
Pervia dal grond dumber da dumondas da medias, da vischnancas e da scolas ha il chantun endrizzà il glindesdi passà in post central da communicaziun. Quel prenda encunter las dumondas e procura per in'elavuraziun speditiva. Ultra da quai vegn el ad infurmar en periodas regularas davart la situaziun actuala e davart temas actuals che occupan la populaziun e las interpresas en connex cun il coronavirus.

Infurmaziuns per la populaziun

Per ulteriuras infurmaziuns per mauns da la populaziun renviescha il chantun Grischun a la suandanta pagina d'internet: www.gr.ch/coronavirus

Per dumondas generalas per telefon stat a disposiziun a la populaziun da lingua tudestga la lingia d'infurmaziun da l'Uffizi federal da sanadad publica:
telefon: +41 58 463 00 00 (mintga di di e notg)

Infurmaziuns a la populaziun da lingua taliana dat la hotline dal chantun Tessin:
telefon: 0800 144 144 (mintga di da las 7.00 a las 22.00)


Agiuntas:
Criteris federals concernent l'execuziun dal scumond d'occurrenzas
Ordinaziun dal chantun Grischun
Agid da decisiun concernent occurrenzas

Gremi: Regenza
Funtauna: rg Chanzlia chantunala

Neuer Artikel