Navigaziun principala

Cuntegn da la pagina

La Regenza ha deliberà la missiva tar il rinforzament dal svilup regiunal

  • Erste Mitteilung
  • Neuen Beitrag einfügen

La Regenza ha deliberà la missiva tar la revisiun parziala da la Lescha per promover il svilup economic en il chantun Grischun. Cun la midada da la lescha vul la Regenza rinforzar il svilup regiunal. Per quest intent duai il management regiunal vegnir concepì da nov. La finamira surordinada da la nova concepziun è quella da dar impuls a l'economia regiunala per augmentar la cumpetitivitad da las regiuns e da las interpresas indigenas, per stgaffir plazzas da lavur en las regiuns sco er per augmentar la valurisaziun.

Las regiuns dal Grischun disponan d'in grond dumber da potenzials economics. Pervia da midadas en il sectur social, tecnologic ed economic è il svilup regiunal confruntà il medem mument cun differentas sfidas. Questa situaziun da partenza pretenda in'utilisaziun pli generusa da las resursas da vart dal chantun e da las regiuns a favur dal management regiunal sco er dapli libertad d'agir per las regiuns.

Nova basa legala dat dapli libertad d'agir
La finanziaziun dal management regiunal duai sa basar en il futur sin la Lescha per promover il svilup economic en il chantun Grischun (LSE). Uschia survegnan las sviluppadras regiunalas ed ils sviluppaders regiunals dapli libertad d'agir. Actualmain vegnan ils posts dal svilup regiunal finanziads mintgamai per la mesadad da la Confederaziun e dal chantun sur la nova politica regiunala da la Confederaziun (NPR). Quai sforza las regiuns en il stretg corset da las prescripziuns federalas. Cun la nova basa legala en la LSE pon vegnir dads dapli impuls a l'economia regiunala grazia ad in portfolio pli lad da projects e da temas.

Perquai che la nova concepziun proponida dal management regiunal surpassa il champ d'applicaziun da la NPR, sto er vegnir adattada correspundentamain la finanziaziun. En l'avegnir duai il chantun pudair pajar a mintga regiun ina contribuziun annuala als custs da persunal da las sviluppadras regiunalas e dals sviluppaders regiunals da maximalmain 50 pertschient. Per realisar il nov concept duai il chantun metter a disposiziun ina contribuziun annuala da maximalmain 875 000 francs. Quai correspunda a la dimensiun da la contribuziun da fin ussa che la Confederaziun ed il chantun pajan al management regiunal en il rom da la NPR. La premissa per conceder la contribuziun chantunala ad ina regiun respectiva è quella ch'ina strategia regiunala per il svilup da l'economia locala, ch'è vegnida approvada dal chantun, saja avant maun.

Responsabladad per il svilup regiunal resta tar ils purtaders regiunals
La regiun respectivamain il purtader regiunal sto pajar ina contribuziun d'equivalenza en l'autezza da la contribuziun chantunala. Uschia vegni er mussà cleramain che la responsabladad per il svilup regiunal resta en emprima lingia en ils mauns da las vischnancas che s'organiseschan en purtaders regiunals. Cun quai vegni tegni quint da grond basegn da questa chaussa, che las vischnancas e las regiuns han manifestà en la consultaziun.

Plinavant duai il chantun pudair sustegnair en il futur pli fitg ils purtaders regiunals tar l'elavuraziun da studis e da concepts che servan a realisar la strategia regiunala per il svilup da l'economia locala. Da nov duai il chantun pudair promover talas prestaziuns preliminaras da purtaders publics – ultra dal sectur da promoziun da la NPR – cun contribuziuns pli autas da fin a 50 pertschient dals custs.

Il Cussegl grond vegn a tractar il project probablamain en la sessiun da zercladur 2020.


Agiunta:
missiva


Infurmaziuns:
cusseglier guvernativ Marcus Caduff, schef dal Departament d'economia publica e fatgs socials, tel. 081 257 23 01, e-mail Marcus.Caduff@dvs.gr.ch   


Gremi: Regenza
Funtauna: rg Departament d'economia publica e fatgs socials

Neuer Artikel