Tar las preparativas per la stagiun da pestga tutga er la retratga da la patenta da pestga. Per pudair retrair ina patenta per in onn u ina patenta per in mais ston ins cumprovar d'avair enconuschientschas da la pestga (attest davart las enconuschientschas da la materia AEM). Pervia da las mesiras da pandemia da la Confederaziun e dal chantun Grischun na pon quests curs betg vegnir purschids per il mument.
I n'è vinavant betg pussaivel da cumprar patentas per ina stagiun u per in mais senza in attest davart las enconuschientschas da la materia. Las ulteriuras patentas da pestga pon vegnir retratgas er senza l'attest davart las enconuschientschas da la materia.
La cumpra da patentas da pestga vegn ad esser pussaivla exclusivamain online u en scrit. Duvrai per plaschair per quest intent la butia online per patentas da pestga sin la pagina d'internet da l'Uffizi da chatscha e pestga (UCP) u empustai a temp la patenta da pestga sin quint tar l'Uffizi da chatscha e pestga a Cuira. Ils ulteriurs lieus d'emissiun (tranter auter la surveglianza da pestga) restan serrads.
App da pestga
ZIl mument actual cusseglia l'Uffizi da chatscha e pestga da far la statistica da pestga cun l'app da pestga dal Grischun empè da duvrar il cudeschet da statistica. Cun retrair la patenta sto la pestgadra u il pestgader decider, sch'ella u el vul far la statistica da pestga a maun u per app. La moda d'endataziun tschernida vala da princip per l'entira stagiun da pestga e po mo vegnir midada directamain tar la centrala da l'Uffizi da chatscha e pestga. Infurmaziuns detagliadas per chargiar giu e per duvrar l'app da pestga chattais Vus sut: www.ajf.gr.ch/Fischerei-App.
Infurmaziuns e formulars
En il Fegl uffizial dal chantun Grischun dals 3 d'avrigl 2020 e sin la pagina d'internet da l'Uffizi da chatscha e pestga èn publitgadas las premissas per pudair retrair la patenta. Sche terzas persunas vulan retrair patentas per persunas cun domicil en il chantun Grischun, ston ellas preschentar in attest da domicil persunal da la petenta u dal petent da la patenta. Formulars correspundents pon vegnir chargiads giu da la pagina d'internet da l'Uffizi da chatscha e pestga.
Attenziun
probablamain a partir da questa stad chattais Vus l'Uffizi da chatscha e pestga a la suandanta adressa: Sinergia, Ringstrasse 10, 7001 Cuira.
Buna pestga!
Gremi: Uffizi da chatscha e pestga
Funtauna: rg Uffizi da chatscha e pestga