Navigaziun principala

Cuntegn da la pagina

La Regenza ha prendì ulteriuras mesiras per mitigiar las consequenzas dal coronavirus

  • Erste Mitteilung
  • Neuen Beitrag einfügen

Las consequenzas per il sectur da la cultura e dal sport pervia da la derasaziun dal coronavirus èn fitg grondas. Pervia da quai ha la Regenza prendì – per cumplettar il program da sustegn da la Confederaziun – mesiras per metter a disposiziun 3 milliuns francs per la cultura ed 1 milliun francs per il sport.

Sustegn per il sport
La Confederaziun sustegna il sport svizzer cun totalmain 100 milliuns francs: 50 milliuns francs per il sectur dal sport professiunal sco emprest senza tschains e 50 milliuns francs sco contribuziuns betg restituiblas per il sport popular. Il sustegn finanzial da la Confederaziun per las organisaziuns da sport datti però mo, sch'i smanatscha ina insolvenza (surdebitaziun) da l'organisaziun e sche las mesiras per gidar sasez pretendiblas èn exauridas.

Per impedir ina reducziun da la prestaziun en il sport popular ed en il sport da prestaziun e per mantegnair la purschida multifara da sport per las gruppas da la populaziun las pli differentas en las vischnancas grischunas sustegna la Regenza las federaziuns grischunas da sport e lur uniuns commembras engrevgiadas fermamain. En moda subsidiara e cumplementara tar las mesiras federalas duai vegnir messa a disposiziun a las federaziuns grischunas da sport ina contribuziun pauschala extraordinaria da tut en tut 1 milliun francs per mantegnair la liquiditad e per cumpensar ina part da las perditas. Per quest intent vegn dumandà tar la Cumissiun da gestiun dal Cussegl grond (CdG) in credit posteriur correspundent a donn e cust dals meds publics generals. En quest connex èn las federaziuns respectivas mintgamai responsablas da sustegnair cun quest import lur uniuns commembras respectivas en moda che tegna quint dal basegn e da la disciplina da sport. L'autezza da la contribuziun pauschala per federaziun sa drizza tenor ils pajaments da G+S da la federaziun respectiva, dal dumber da commembras e commembers e dal dumber da las uniuns commembras.

Sustegn per la cultura
Il Cussegl federal ha deliberà ils 20 da mars 2020 in pachet da mesiras da 280 milliuns francs per la cultura. Ils 6 d'avrigl 2020 ha la Confederaziun communitgà ch'ils agids finanzials sco er las directivas per realisar las mesiras sajan ussa pronts. Circa 5 milliuns francs stattan a disposiziun al chantun Grischun. Da quels vegnan mess a disposiziun 3 milliuns francs per indemnisar perditas e 2 milliuns francs sco agid immediat (emprests). La Regenza dal chantun Grischun ha l'intenziun da deliberar er 3 milliuns francs per indemnisar perditas. Er per quest intent vegn dumandà in credit posteriur da la CdG. Il chantun vegn a pudair far ils emprims pajaments, cur che la cunvegna da prestaziun cun la Confederaziun, che regla las modalitads, è suttascritta.

I dat differentas pussaivladads per las artistas ed ils artists, per las interpresas e las instituziuns culturalas sco er per las uniuns culturalas en il sectur betg professiunal da dumandar sustegn. Tut tenor il gener dal sustegn èn cumpetents differents posts. Dumondas d'agid d'urgenza per artistas ed artists per cuvrir ils custs da viver directs vegnan examinads da l'associaziun Suisseculture Sociale. Dumondas d'agid finanzial per uniuns laicas en il sectur da la cultura vegnan elavuradas da las federaziuns da tetg responsablas. Davart dumondas d'agid da liquiditad per interpresas culturalas che n'han betg ina finamira da rendita sco er davart dumondas per indemnisar perditas d'interpresas culturalas e d'artistas e d'artists decida il chantun respectiv. Ils formulars da dumonda respectivs ed ils fegls d'infurmaziun stattan a disposiziun sin la pagina d'internet da la Promoziun da la cultura dal Grischun.

Infurmaziuns: 
cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 02, e-mail Jondomenic.Parolini@ekud.gr.ch


Gremi: Regenza 
Funtauna: rg Departament d'educaziun, cultura e protecziun da l'ambient

Neuer Artikel