Navigaziun principala

Cuntegn da la pagina

Coronavirus (COVID-19)

La pandemia dal coronavirus influenzescha anc adina massivamain la vita culturala. Mesiras da protecziun sco er il spustament e l'annullaziun d'occurrenzas e da projects culturals han consequenzas per numerusas instituziuns culturalas e per bleras artistas ed artists. A medem temp vegnan sviluppads projects e concepts per s'adattar a las cundiziuns generalas che sa midan d'in cuntin.

 

Ils 20 da settember 2020 è scadì il termin per inoltrar dumondas per indemnisaziuns da las perditas per donns finanzials fin la fin d'october. Quai, perquai che la validitad da l'Ordinaziun federala davart COVID‑19 cultura era limitada a 6 mais ed è scadida ils 20 da settember 2020. Per mitigiar las consequenzas dal coronavirus ch'èn anc adina massivas en il sectur da la cultura e per mantegnair la diversitad culturala vegnan fatgas tant tar la Confederaziun sco er en ils chantuns lavurs intensivas per stgaffir las basas per pudair cuntinuar cun las mesiras da sustegn en il sectur da la cultura. La basa respectiva vegn ad esser l'art. 8 da la Lescha federala COVID‑19 ch'è en planisaziun. Igl è previs ch'ils chantuns pon pajar a las interpresas culturalas – a partir dal 1. da november 2020 – er vinavant indemnisaziuns da las perditas e da nov cunzunt er contribuziuns a projects da transfurmaziun. La finanziaziun duai er vinavant esser chaussa tant da la Confederaziun sco dals chantuns.

 

Da nov duai mo pli l'uniun Suisseculture Sociale esser il post da consultaziun per artistas ed artists; ils chantuns na pajan pli naginas indemnisaziuns da las perditas. Persunas che lavuran sin il champ cultural duain survegnir – sin dumonda – vinavant prestaziuns finanzialas betg restituiblas per cuvrir ils custs da viver directs, uschenavant ch'ellas na pon betg finanziar sezzas quests custs. Plinavant pon artistas ed artists cun activitad da gudogn independenta retrair er suenter ils 16 da settember 2020 indemnisaziuns da la perdita da gudogn pervia dal coronavirus tar la Cassa da cumpensaziun chantunala, sch'ellas ed els han stuì serrar lur manaschi u sche lur occurrenzas èn vegnidas scumandadas. Per quest intent ston ellas ed els dentant inoltrar ina nova dumonda a la Cassa da cumpensaziun.

 

Uniuns culturalas da laics duain survegnir er vinavant ina indemnisaziun da las federaziuns da tetg per il donn finanzial pervia d'ina reducziun da lur occurrenzas.

 

Infurmaziuns pli detagliadas davart la cuntinuaziun da las mesiras da sustegn en il sectur da la cultura sco er novs formulars da dumonda chattais Vus il pli baud a partir da mez november 2020 sin questa pagina d'internet.