TextID MasterPage.Accessibility.Head.ContentBody (rm-CH) not found

Incumbensa a la Promoziun da la cultura

La promoziun da la cultura dal chantun Grischun sa basa sin la lescha per promover la cultura (LPC; DG 494.300) e sin l'ordinaziun tar la lescha per promover la cultura (ordinaziun per promover la cultura, OPC; DG 494.310). Cun differentas mesiras da promoziun s'engascha il chantun per ina vasta vita culturala e per ina viva confruntaziun cun las tradiziuns vividas. En sia totalitad duai la promoziun chantunala pussibilitar ad uschè bleras gruppas da la populaziun sco pussaivel da sa participar a la vita culturala.

La promoziun chantunala da la cultura conceda contribuziuns unicas a projects da differentas spartas. I vegnan sustegnidas activitads culturalas e furmas artisticas experimentalas, popularas ed etablidas dals suandants secturs:

- art figurativ
- art applitgà
- film
- litteratura
- musica
- saut
- teater
- istorgia e memoria
- intermediaziun e barat

La promoziun chantunala da la cultura sustegna en moda subsidiara; ella s'engascha adina cumplettond las contribuziuns da persunas privatas e da vischnancas.

Ultra da quai sustegna il chantun instituziuns culturalas d'impurtanza chantunala cun subvenziuns periodicas annualas.

Il chantun Grischun promova er artistas ed artists professiunals cun contribuziuns ad ovras che vegnan publitgadas e surdadas mintga onn en il rom da concurrenzas. La promoziun da la cultura dal Grischun publitgescha dus stipendis d'atelier a Vienna per profilar las prestaziuns culturalas.

Sin proposta da la cumissiun per promover la cultura conceda la regenza mintga onn premis da promoziun e premis da renconuschientscha. Prestaziuns extraordinarias culturalas e scientificas pon vegnir onuradas cun il premi grischun da cultura.