En il Concept per promover la cultura 2021–2024 èn vegnids fixads trais accents da promoziun per la perioda da 4 onns 2021 fin 2024. Tenor l'accent da promoziun 3 duai la promoziun dal film vegnir structurada. Ultra da quai duai vegnir elavurà e realisà in model da promoziun, davent dal scenari fin a la producziun ed a l'evaluaziun, per realisar projects da film.

Ils 20 da zercladur 2023 ha la Regenza dal chantun Grischun approvà il model per la promoziun dal film. Quel definescha las cundiziuns generalas structuradas per cineastas e cineasts e per producentas e producents professiunals dal chantun sco er per projects da film che han ina relaziun expressiva cun il chantun.

 La promoziun s'extenda sin las suandantas fasas e sin ils suandants secturs da project da films lungs, films mesauns e films curts, da films dramatics e films documentars, da films animads e films experimentals:

• Svilup dal scenari e dal project
• Producziun
• Postproducziun
• Distribuziun (preschentaziun ed intermediaziun)

Dretg da survegnir contribuziuns

Promovids vegnan projects da film, als quals èn participads cineastas e cineasts grischuns en posiziuns decisivas u ils quals han ina relaziun tematica suffizienta cun il chantun Grischun. Sustegnids vegnan en emprima lingia projects d'auta qualitad da cineastas e cineasts professiunals e da firmas da producziun, d'organisaturas e d'organisaturs d'occurrenzas da films e d'organisaziuns culturalas da film. Exclus da la promoziun èn producziuns puramain commerzialas sco films d'incumbensa e films da reclama sco er artitgels da promoziun (p.ex. films da preschentaziun u films da scolaziun).

Premissas

Per il pajament d'ina contribuziun chantunala ston esser ademplidas las suandantas premissas:

• La dumonda sto vegnir inoltrada cumplettamain.
• Ils termins vegnan observads.
• L'instituziun responsabla, las cooperaturas ed ils cooperaturs ed/u il project han in connex expressiv cun il chantun Grischun tenor ils puncts a - e.
• L'intent principal e la finamira èn da gener cultural.
• Il plan da finanziaziun ed il preventiv èn persvadents ed equilibrads. Els correspundan a las prescripziuns da l'Uffizi federal da cultura (UFC).
•  Il project è accessibel a la publicitad.

La Promoziun dal film dal Grischun sustegna projects da film svizzers da cineastas e cineasts, da firmas da producziun e d'organisaturas ed organisaturs d'occurrenzas da films, ch'èn grischuns e professiunals. Sco persunas participadas grischunas valan:

a) auturas ed auturs, reschissuras e reschissurs, sco er producentas e producents professiunals, sch'els han lur emprim domicil legal en il chantun Grischun dapi almain 2 onns. En cas d'in coauturadi u en cas d'ina coreschia sto esser cumprovada – en ils contracts – la funcziun directiva grischuna d'almain 50 % per che la persuna respectiva possia inoltrar ina dumonda. Sco cumprova per il domicil vala in attest da domicil. Admessas èn er auturas ed auturs, reschissuras e reschissurs sco er producentas e producents che han gì lur emprim domicil legal durant 15 onns en il chantun.

b) societads da producziun, sch'ellas han lur sedia principala inscritta ed operativa dapi almain 2 onns en il chantun Grischun u sch'ellas èn activas dapi almain 2 onns ed èn per almain 30 % en possess da persunas tenor l'alinea a). Dal scumond da publicaziun èn exceptadas en il Grischun las fundaziuns novas da producentas e producents ch'èn domiciliads dapi almain 2 onns en il chantun. Sco cumprova sto vegnir inoltrà in extract dal register da commerzi.

c) projects da firmas da producziun svizras extrachantunalas, sche auturas ed auturs u reschissuras e reschissurs grischuns èn participads – tenor ils contracts – per almain 50 % en lur funcziun directiva.

d) projects che han ina relaziun cun il Grischun da firmas da producziun svizras extrachantunalas, sch'els concludan ina coproducziun cun ina societad da producziun en il Grischun ch'è qualifitgada tenor l'alinea b). La premissa è quella, che la summa da promoziun vegn sbursada en il Grischun. La dumonda sto vegnir inoltrada tras la firma grischuna coproducenta.

e) interpresas da preschentaziun, festivals da films e clubs da film en il Grischun che organiseschan retschas da films en il chantun e che pretendan entradas per talas e che fan giu quint cun las possessuras ed ils possessurs dals dretgs – sco er emprestadras ed emprestaders svizzers da films grischuns tenor ils alineas a) fin d). La sedia giuridica po esser situada ordaifer il Grischun.

Criteris da valitaziun

La qualitad e l'impurtanza d'in project vegnan valitadas a maun dals criteris menziunads qua sutvart. L'interpretaziun dals criteris n'è betg definitiva e po sa midar en dependenza dals svilups culturals. Sustegnidas prioritarmain vegnan activitads cinematograficas che adempleschan – en il rom d'ina consideraziun cumplessiva – particularmain bain ils criteris.

Termins d'inoltraziun

Ils termins d'inoltraziun per las dumondas èn: ils 10 da favrer, ils 10 da zercladur, ils 10 d'october. Las dumondas vegnan examinadas trais giadas per onn da la Promoziun da la cultura dal Grischun sco er da la Cumissiun chantunala da cultura.

______________________________________________________________________________________________________________

Pussaivladads da promoziun

 Per tut las contribuziuns da promoziun vali, ch'ellas na dastgan betg surpassar – per project e per dumonda – 50 % dals custs budgetads ed imputabels. Uschia vegni garantì, che la promoziun grischuna è subsidiara e che l'import restant vegn finanzià cun contribuziuns d'autras instituziuns u cun atgnas prestaziuns.

• Svilup dal scenari e dal project

Cun ina contribuziun per sviluppar il scenari ed il project vegn promovida l'elavuraziun da projects da film e da models da filmar. Valair valan las suandantas contribuziuns maximalas: preventiv da svilup fin 100 000.– francs: max. 20 000.– francs; preventiv da svilup da 100 000.– francs fin 200 000.– francs: max. 50 000.– francs,dentant maximalmain 25 % dal preventiv da svilup.

• Producziun

Ina contribuziun da producziun po vegnir concedida per la producziun da films lungs e da films curts.
Per la promoziun da producziun valan las suandantas contribuziuns maximalas: film curt / film final senza firma da producziun: max. 20 000.– francs; televisiun / films mesauns / animads / seria da fin 60 minutas: max. 60 000.– francs; producziun da films lungs da kino (ficziun, documentar, animads) e da serias da pli che 60 minutas: max. 100 000.– francs

• Postproducziun

Ina contribuziun a la postproducziun po sustegnair projects d'ina durada da pli che 60 minutas («formats lungs»), dals quals la producziun n'è betg vegnida finanziada da la Promoziun dal film dal Grischun. Per promover la postproducziun vala la contribuziun maximala da max. 20 000.– francs.

• Distribuziun

Cun contribuziuns da distribuziun selectivas pon vegnir sustegnids organisaturas ed organisaturs d'occurrenzas da film per retschas da film culturalmain preziusas e per festivals en il Grischun sco er emprestadras ed emprestaders da film per l'utilisaziun da films grischuns en kinos en Svizra. Admess èn mo lungs programs da film che duran pli che 60 minutas. La contribuziun maximala per organisatura u organisatur è en il Grischun max. 15 000.– francs per onn. En cas d'interpresas d'emprest vegni fatg giu quint cun pauschalas per mintga preschentaziun singula.

______________________________________________________________________________________________________________

Documents

concept promoziun dal film en il grischun

Promoziun dal film dal chantun Grischun

formular da dumonda Svilup dal scenari e dal project

formular da dumonda Producziun

formular da dumonda Postproducziun

formular da dumonda Distribuziun